Tura, Rymphang 16: U Myntri Kam Pohiing ka ri u Amit Shah haka jingialap elekshon ha Nongbah Tura ula ther tyngeh ia u Myntri Rangbah ka jylla Conrad K Sangma uba la ialam iaka sorkar jylla kaba jyllei tang da ki kam bamsap bad kaba la shet kylla iaka jylla ha kaba iadei bad ki kam pynroi.
Une u Myntri ka sorkar pdeng ula kynnoh ba ka jylla Meghalaya shen ka lah ban kyrduh iaka bording elektrik khamtam haba ka tnad MeECL jong ka sorkar jylla ka don hapdeng ka jingma ban khyllem noh namar ka jingbamsap.
“Ka Meghalaya kadei ka jylla kaba wan hakhmat eh hapdeng ki jylla jong ka ri India ha ka liang ka kam bamsap bad dei tang lyngba ka seng BJP kaba khlain kaba lah ban pynlong iaka Meghalaya kaba khlain” ong u Amit Shah.
Ula iaroh ia u Myntri Rangbah duh ka ri u Narendra Modi uba la rat dyngkhong ia ki kam bamsap kiba la pyndkoh iaka ri la palat 50 snem.
“Naduh u snem 2014 haduh u 2023 la dep ban rat dyngkhong ia ka kam bamsap haka ri hapoh ka jingialam u Myntri Rangbah duh ka ri u Narendra Modi” ong u Shah.
Ula kynnoh ruh, ba ka sorkar kaba ialam da ka NPP kala pulom ha kaban pyntreikam iaki skhim jong ka sorkar pdeng kiba dei kiban ai jingmyntoi ia ki paidbha ka jylla.
“U Modi ula dep ban pylliat bun phew tylli ki skhim naka bynta ka jylla Meghalaya, hynrei kila shu jah rngai noh haba kila poi ha kane ka jylla” ong u Myntri Kam Pohiing ka ri.
Ula ong, ka Meghalaya kam pat don tang kawei ka Medical College ruh watla ka sorkar pdeng kala dep ai jingmynjur ia ar tylli ki medical college bad ula ong, ka sorkar pdeng ka dang iaid shakhmat ha kaban pynlong ia ka pule puthi da kaba pyndonkam iaka ktien Garo naduh naka jingpule ha ka Primary haduh Higher Secondary.
U Amit Shah ula buh jingkylli ruh ba kumno ka jylla Meghalaya kaba rit ka dap da ka ram ka shah haduh 1800 Klur bad kala hiar ruh ha ka ioh ka kot bad wat ka RBI kala iathuhlypa ba kan don ka jinghiar ka ioh ka kot jong ka jylla Meghalaya.
U Amit Shah ula ong hapoh ka jingialam ka BJP, ula kular ban tei ia kawei ka IT Park kawei ha rilum Khasi-Jaintia bad kawei ha rilum Garo ryngkat bad ka jingai iaka Special Economic Zone kaba T. 100 Klur kum ka jingai jingiarap ia ki MSME ban kyrshan ia ki nongseng ia ki karkhana rit.
Ula kren ruh ha kaba iadei bad ka T. 5000 Klur ban ai jingkyrshan ban tei ia ki surok ha Meghalaya, ban tei 39 tylli ki Eklavya School ha ka jylla bad ban mang T.6000 Klur lyngba ka Prime Minister’s Development Initiative for North East Region (PM-DevINE).
