Nongpoh, Iaiong 05 : Ki Nongthep pisa jong ka Meghalaya Rural Bank (MRB), Umden Branch, kila kynnoh ba kane ka Bank kala shim pisa mynta haduh T. 5 kum ka jingsiew ia kawei ka slip thep pisa (deposit) ne sei pisa (withdrawal), ka bym pat ju jia koit mynno mynno ruh ba ki Bank kin ohdor ia ka bai slip.
Kane ka jingkynnoh kala mih hynne ka sngi Balang haba ki nongleit thep pisa bad nongsei pisa, kila shah pan pisa kum ka bai slip ha ki bor pyniaid ka Bank, kiba la pynlong ia kawei ka dukan Xerox kum ka jaka ai slip jong ka bank.
Ia kane la lap hadien ba ki katto katne ki samla kila leit rung ha kane ka Bank hadien ka jingioh pdiang ia ki jingujor na ki paidbah, ha kaba kila lap dalade ba ki paidbah kila hap shim slip naka dukan Xerox ba kin leit thep ne sei pisa na kane ka bank.
Haba iakren bad u nongthoh khubor, u Bah Sylvanus Mallai uba dei uwei na ki nongialam ka thain, ula pynpaw ia ka jing sngewkhia halor ka jingshim kabu jong kane ka Bank ban kamai pisa na u paidbah. Ula ong ba kane ka jingleh ka Bank ka dei ka bym pat ju jia mynno mynno ruh.
Kat kum ka jingong jong u, kane ka Bank kala phah ia ki paidbah nongleit thep bad nongsei pisa, ba kin leit shim ia ki slip na kawei ka dukan Xerox da kaba siew T. 5 kawei.
“Ka kam ban pynbiang ia ki slip sei bad thep pisa ka dei ka kamram jong ka Bank hynrei lyngngoh ba kumno kane ka Bank kala phah leit shim ia ki slip na ka dukan Xerox bad bthah ban siew da ka dor” ula buh jingkylli.
Ula kynnoh ba kane ka dei tang ka jingshim kabu jong ki Nongtrei ka Bank naba u Branch Manager um don satia bad ba u dang shim shuti. Ula kyrpad ia ki bor ba dei khmih ban leh eiei halor kane ka jingleh kane ka Bank.
