Shillong, Iaiong 14: Ka Khun Hynniewtrep National Awakening Movement (KHNAM) hynnin ka sngi kala ong ba ka jingpynlip bording khah khah daka Meghalaya Energy Corporation Limited (MeECL) ka long ka jingpynkhein iaka hok ki paidbah katkum ka “Electricity (Rights of Consumers) Rules, 2020” jong ka sorkar pdeng.
Haka kyrwoh bala phah da u vice president ka KHNAM u bah Thomas Passah, kala ong ba ia kane ka Rule la pyntreikam daka sorkar pdeng bad kane ka kyndon ka treikam ha baroh kawei ka ri India.
U bah Thomas ula ong ba ka sorkar pdeng kala pyntreikam iaka Electricity (Rights of Consumers) Rules, 2020 naka bynta ban pynthikna ba ki paidbah ki ioh beit iaka bording bad katkum ki kyndon ka sorkar pdeng kine ki rule ruh ki don naka bynta ban shakri iaki paidbah haba iadei bad ka jingsam bording.
“U myntri ka tnat bording ka sorkar pdeng ula ong ba ki kompani bording kiba dei ki Monopoly ruh la kidei jong ka sorkar ne riewshimet bad namar ki paidbah kim don lad, la thaw iaki Rule naka bynta ban pynthikna ba ki kompani kin ai ka jingshakri ka ba janai iaki paidbah” la ong u bah Thomas.
U bah Thomas ula ong ba ki Rule ki batai ba ki paidbah ki don ka hok haba iadei bad ka jingsam bording, ban ioh license, ka bailutksan bad kiwei kiwei de.
“Kane ka jingpynlip bording khah khah kadei ka jingniew bein iaki paidbah katkum ki Rule ka sorkar pdeng bad naka liang ka sorkar jylla ruh kadei ban shim khia halor kane” la ong u bah Thomas.
Nalor kane u bah Thomas ula ong ba nalor ka jingpynlip bording, ki paidbah ki mad jingeh ruh haba iadei bad ka umbam bad kane ruh ym lah ban pdiang nalor ba ki paidbah ki siew khajna bad kane ruh kadei ka jingiuh roit iaka hok briew.
