Shillong, Nohprah 15 : Ka kynhun kiengatiar Hynniewtrep National Liberation Council (HNLC) kala pynpaw ia ka jingsngewkhia bad pynrem jur ia ka jingiai bteng ka Khasi Hills Autonomous District Council (KHADC) ban pynslem ha ka ban ai sanad ia u Bah Maremdor Syiem kum u Syiem ka Hima Sohra.
Kat kum ka jingong ka HNLC, ka Kur bad ki paidbah ka Sohra kila dep pynbna ia u Bah Maremdor Syiem kum u nongshim ti pateng ia ka khet syiem hadien ka jingkhlad noh u Pa’iem Freeman Syiem, kaba long kat kum ka riti ka dustur u Hynniewtrep bad ka synshar khadar tynrai ba ju leh.
“Ka rai kam shym la long kaba kyrkieh lane kaba la pynkhih da ki jingpyrkhat sain pyrthei; ka dei ka jingbteng kaba tynrai bad kaba dei hok jong ka rukom synshar tynrai jong ka Sohra,” ong u general secretary ka HNLC Bah Sainkupar Nongtraw ha ka kyrwoh
Ka jingpynslem ban ai ia ka sanad kala wanrah ia ka jingeh ha ka synshar khadar, ha kaba ki kam kiba kongsan kila sahkut lut, kynthup ka jingaplai ia ki grant, ka jingai No Objection Certificate bad ki kam ba ju leh kiba donkam ia ka jingsoi kyrteng u Syiem.
Ka HNLC kala ban jur ba ka Sohra kam dei kaba khlem u Syiem, namar ia u Bah Maremdor Syiem lah dep ban pdiang da ka Kur bad ki paidbah bad kaba sah ka dei satang ka jingpynskhem ia ka jingithuh da ka KHADC.
“Ka Sanad kam dei kaba ai ia ka bor; ka pdiang ia ka bor kaba la don lypa lyngba ka dustur, ka jingmynjur, bad ka jingbteng,” ong u nongialam ka HNLC, haba dawa ia ka KHADC ba kan shimkhia ha ka por kaba biang ban wanrah ia ka synshar khadar kaba iaid beit iaid ryntih bad burom ia ka synshar tynrai.
Ka HNLC kala maham ba ka jingbteng ban pynslem ban ai sanad ka buh ha ka jingma ba lah ban pyntroin ia ki jingleh tynrai ka Jaidbynriew Hynniewtrep bad pyntlot ia ki Hima haba bynrap ba ki paidbah ka Sohra kim kwah ia ka jingiarap kyrpang hynrei ban burom ia ka hok tynrai bad jingithuh ia u nongialam ba kila jied.
