SHILLONG, Risaw 05: U president ka seng Hynñiewtrep Integrated Territorial Organization (HITO) u bah Donbok Dkhar ula kam ba lada ka sorkar ka pynkhein iaka ain bad ka shah ia ki trok ban shalan dewiong, ki riew paidbah ruh kim dei ban tieng bad kidei ban sdang noh ban khaii dewiong khlem da donkam siew pisa.
Haba kren sha ki lad pathai khubor u bah Donbok ula kynnoh ba haduh mynta ka jingkhaii tuh dewiong ka dang bteng bad ka dang jur bha hapoh Meghalaya namar ka sorkar jylla kam don bor ban kem ne pynshitom iaki nongkhaii tuh dewiong kiba don hapoh ka kynhun High Level.
U bah Donbok ula kynnoh ba mynta dang step phyrngap ka seng kala ioh bat bun tylli ki trok kit dewiong kiba khlem Nomber Plate bad kane ka paw ba ka jingkhaii tuh dewiong hapoh ka jylla haduh mynta ka dang jur bha namar ka sorkar ruh kam leh eiei pyrshah iaki ba donkti.
U la ong ba ka jingkam u myntri rangbah bad u symbud myntri rangbah ka jylla ba ki trok kit dewiong kidei ki ba don iaki Challan ka long kaba bakla namar katkum ka jingthoh bala ioh naka tnat Directorate of Mineral Resources (DMR) ka kren shai ba ka jingai Challan kadei hadien bala pyndep iaka jingpyndait daki Centralize Server bad ka jingpyndait da ki GPS haki trok kit dewiong.
“Lada ka sorkar ka kam ba ki trok kit dewiong kiba ki dkhot ka seng ki ioh bat man ka por, sngewbha ai iaki kyrteng jong ki briew kiba la ioh Challan bad iaki Nomber Plate jong kito ki kali kiba la biang lut nadong shading katkum ki kyndon ka DMR” la ong u samla Donbok.
U samla Donbok ula kynnoh ba ka jingmih ki dkhot ka seng lane ki riew paidbah ban bat iaki trok kit dewiong kadei namar baka tnat pulit kam leh eiei bad ka tnat DMR ruh kam don bor watla la pynkupbor ia kane ka tnat ban tehlakam iaka jingkhaii tuh dewiong.
“Ka seng ka kren da ka ba shai ba lada ia u High Level, u lah ban iaid sha surok, te ki paidbah ruh khamtam kito kiba kamai jakpoh na u dewiong ki don ka hok ban im katkum ka Article 14 bad 21” la ong u samla Donbok.
U bah Donbok ula kynnoh ruh ba ka jingdon ki High Level ka pynduh nong iaka pla tyngka ka sorkar namar ka pisa ba lum na ki khyrdop ka leit sha ki sengsain pyrthei bad ki MLA shimet bad dei namar kane ki paidbah kidei ban tip iala ka jong ka hok ban mih bad ban sdang shalan noh ia u dewiong ban ioh kamai jakpoh.
