Nongstoiñ, Jymmang 2: Ka seng Hynñiewtrep Achik Youth Front (HAYF) kala kynnoh ba kawei ka karkhana bala tip kum ka M/S Shree Shakambari Ferro Alloy Pvt Ltd kaba don ha Rwiang, Nongstoin, West Khasi Hills, kala treikam beain bad pynkhein ia ki kyndon ain jong ka Tnad Labour bad kiwei kiwei.
Kane ka jingkynnoh kala mih hadien ba kane ka seng hapoh ka jingialam u President Bah Banraplang Kharpor, kala leit ban jurip ia kane ka karkhana hynne ka sngi Ba-ar.
Haba iakren bad ki nongthoh khubor, une u Nongialam ka HAYF ula pyntip ba kane ka jingjurip ka dei kaba la pynlong hadien ba ka seng kala ioh pdiang ia ka jingujor na ki nongshongshnong ka thain, ba kane ka karkhana kala pyntrei bylla ia ki Khynnah kiba dang hapoh ka 18 snem ka rta, kaba long pyrshah ia ka ain ai bylla.
“Ka Seng kala lap dalade ba kane ka karkhana kala pyntrei bylla ia ki khynnah kiba dang rit ka rta” ula ong haba pyntip ba ki don ruh ki nongbylla bar jylla kiba la wan trei khlem ki kot ki sla kiba biang.
Ha kajuh ka por, ula kynnoh ba kane ka karkhana ka ju leh shiliang ruh ia ki Khasi kiba trei ha katei ka karkhana bad kim shym la pynbiang ia ki jingdonkam kumba ki pynbiang ia ki bar jylla la ka dei ka juti, ki jingda khmut, ki jingdeng kti bad kiwei kiwei.
La kynnnoh ruh ba wat ia u fly ash ne u pui pui uba mih n aka karkhana, ym shym la tep satia kat kum ka rukom hynrei la shu bret pathar kaba buh jingma ia ki wah ba don ha ka thain.
Kane ka seng kala byrngem ban sa leit mudui sha ki bor ka District pyrshah ia kine ki kam jong kane ka karkhana.
Na ka liang u manager ka karkhana ula kyntait ia ka jingkynnoh ba pyntrei byla ia ki khynnah haba kubur pat ba ha ka jinglong briew kin don beit ki jingdkoh ha ka jingtrei ia ka kam.
