Nongstoin, Jylliew 04 : Ka FKJGP Rambrai Circle, kala kynnoh ba 3 tylli ki Iing kila julor bad 2 ngut ki heprit kila mynsaw na ka jingwan hap ki maw kiba pynbthei da ka kompani shna surok Highway ha ka thain kaba la tip kum ka Spica Company.
Kane ka jingjia kala jia ha ka shnong Mawthir, ong ka FKJGP Rambrai hadien ka jingwan hiar jurip ia kine ki iing ba julor bad wan jngoh ia ki heprit ba mynsaw hynne ka sngi Ba-ar hapoh ka jingialam u Education Secretary Skalanboksin Paliar.
Kane ka Seng kala kynnoh ba kane ka kompani kala pynbthei bomb kulmar ban pynpra ia ki maw ha ka thain khlem da shim ia ki lad ki lynti ban nym buh jingma ia ki jingim briew bad ki nongkynti.
Ka FKJGP ka pynrem jur ia kane ka kompani bad kala dawa ba dei ban siew bai lutksan ia kiba mynsaw nalor ban pynshna thymmai ia ki iing ba julor.
Kala ong ba kane ka jingpynbthei bomb kulmar kala wanrah ia ka jingshongsyier ia ki paidbah.
Kala pyntip ba shen kan sa leit iakynduh ia ki bor khmih jong kane ka kompani ban buh ia ki jingdawa haba ong ba lada ka kompani kan leh eiei, ka seng kan sa leh ia kaba donkam wat ban pynsangeh shuwa ia ka jingtrei.
