Nongpoh, Nailur 09 : Watla ki ar jylla ka Meghalaya bad Assam ki dang pynkhreh shaid shaid ia ka jingiakren pynbeit pud jong ka wat kaba ar, hynrei la kynnoh Assam ka la kyntur pud shapoh ka Hima Nongspung da kaba shna ia ka surok hapoh ka Shnong Bakhlapara, Ri-Bhoi.
Ia kane la kynnoh da ka seng Hynniewtrep Achik National Movement (HANM), Western Ri Bhoi hadien ka jingleit jurip ia kane ka surok lem bad ki nongialam ka Raid Warmawsaw bad Raid Umsohbar.
Ia kane ka jinghiar jurip, la lamkhmat da u President samla Sumar Lyngdoh lem bad ki dkhot ha ka jingiadonlang ruh ki nongialam ka Raid Warmawsaw bad Umsohbar kiba kynthup ia u Bah Slen Lyngdoh, Sordar Shnong Umsohbar, Bah Pingstone Pator, bad u Bah Etlas Lyngdoh lem bad kiwei kiwei.
Haba iakren bad ki nongthoh khubor, u samla Sumar Lyngdoh u la pynpaw ia ka jingsngewkhia kaba jur halor ka buit sianti bad ka jingbym burom ka sorkar Assam lyngba ka tnad PWD ia ka jingiakut hapdeng ki ar jylla Assam bad Meghalaya ban pynsangeh shwa ia ki jingtei ia ki kam pynroi ha ki shnong khappud katba ym pat ban lah ban pyndep ia ka jingiakren pynbeit pud kaba tikna lyngba ka wat kaba ar.
Ka seng kaa pynpaw ia ka jingsngewlyngngoh kaba khraw ba kumno ka sorkar Assam ka dang nud ban kyntur pud da kaba wanrah ia ki kam pynroi khlem da ioh ia kano kano ka jingbit ne ka jingpyntip lang sha ki bor ka sorkar Meghalaya.
Namar kane, ka HANM ha ryngkat ki ar Raid ki la dawa na ka sorkar jylla Meghalaya ba ka dei ban shimkhia mardor ban tuklar halor kane kajingwan tei ia u surok da ka Assam ha Baklapara kaba dang hap hapoh ka Hima Nongspung, ha Ri Bhoi Sepngi.
