Nongstoiñ, Nohprah 13: Ka Hima Nongstoiñ lyngba ka Nongstoiñ Memorial Celebration Committee, mynta ka sngi ba-ar, ka la pynlong ïa ka jingkynmaw burom ïa ka lyngkhuh sngi ïap kaba 58 jong u Paiem Sibsing Syiem, Syiem ka Hima Nongstoiñ.
Ka Hima ka la pynlong ïa ka jingïalang kaba lyngkot, da kaba pynlong ruh ïa ka jingsngap jar kaba shi minit bad bteng pat ia ka jingbuh syntiew ha u mot sah kynmaw, u ba don ha phyllaw jong ka ophis u Syiem ka Hima Nongstoiñ.
Ha kane ka sngi ba kyrpang, la ïadon ryngkat lang u Paiem E.P Syiem, Syiem ba mynta ka Hima Nongstoiñ, u Paiem R.K Syiem, Syiem Khynnah ka Hima Nongstoiñ, ki nongsynshar shnong ka kur Syiem ki riew rangbah bad kiwei kiwei.
Haba ai jingkren, u Paiem ka Hima u la pynkynmaw ba u Syiem Sibsing Syiem u dei u ba pass tang ïa ka klas 8, hynrei u long u Syiem u ba stad bad ba shemphang bad u dei ruh u nonghikai skul.
U la ïathuh ruh ba dei u Syiem Sibsing u ba la pynshlur ïa ka Hima Nongstoiñ ban plie noh ïa ki skul ME ha Nongstoiñ bad sha kiwei ki jaka jong ka Hima. Nalor nangta u Syiem Sibsing u la ïoh kyrteng ha ka skul Sibsing kaba don ha Nongpyndeng. Mynta pat u ne u Syiem u la ïoh kyrteng biang sa ha ka IB jong ka PWD da ka jingshimkhia jong u MLA bah Macmillan Byrsat.
U la pynkynmaw ruh ba u Syiem Sibsing ula shah kem ha ki shipai Bilat namar ka jingkyntait ban soi ia ka Soskular Instrument of Accession katba um pat dep lum ia ka Dorbar Hima. U ong ba dei hadien bala dep shong dorbar ba ula soi ia kane ka soskular ha ka 19 tarik u Iaiong 1948 ryngkat ruh bad ka Annexed Agreement.
