Shillong, Iaiong 13 : U Chairman ka Hynniewtrep Border Dispute Redressal Forum (HBDRF) Candame Sungoh ula ong ba ka 13 tarik u Iaiong kan dei ka sngi ka ban sah kynmaw kum ka “Sngi ba Sngewsih” ia ki paid Khasi-Pnar kiba sah ha Block-I bad Block II.
Ha ka kyrwoh, u Bah Chandame ula ong ba dei ha kane ka sngi jong u snem 1951 ba ka Sorkar Assam ha katei ka por, kala tan jubor ia ka Labang Nongphyllut Dolloiship bala tip kum ka Block-I bad shibynta jong ka Raid Nongtung Khyrwang bala tip kum ka Block-II bad pynhap ha ka United Cachar & Mikir Hills mynta ka Karbi Anglong Autonomous Council ka Assam ha ka por ba pynkha ia ki District Council da ka jingpynbna paidbah (Notification) TAD / R/ 31/ 50/ 149 .
“Ia kane ka jingpynbna paidbah la leh da ki riew leh donbor jong ka Sorkar Assam khlem ka jingtip bad ka jingmynjur jong ki paid Khasi-Pnar, kiba trei ki trai bad ki nongshem ia kane ka khyndew. Bad kane ka jingleh donbor kala pynduh lut ia ka hok bad ka jingbishar ba hok ia ki nongshongshnong jong ka thain” ula ong.
U Bah Chandame ula ong ba ka Forum bad ki paidbah jong ka thain kin iai bteng ban pyrshah jur ia kane ka jingleh donbor bad ka jingleh bym hok jong ka Sorkar Assam bad ki dang iasaid mynta ban lah pynphai bad wanrah biang ia kane ka jaka sha ka Ri ki kpa tynmen ka Jylla Meghalaya.
Ka Forum ka pynpaw ia ka jingsngew skhem ba lyngba ka jingiapynbeit pud ba dang iaid mynta hapdeng ka Jylla Meghalaya bad Assam, kane ka jingdawa bala sahteng laslem bha ban pynphai pat ia ka Block-I bad Block-II sha Meghalaya kan ioh ia ka jingmynjur.
 Candame Sungoh ula ong ba ka 13 tarik u Iaiong kan dei ka sngi ka ban sah kynmaw kum ka “Sngi ba Sngewsih” ia ki paid Khasi-Pnar kiba sah ha Block-I bad Block II.){kind=link}