Shillong Nohprah 30: Ki sengbhalang bapher bapher hynne ka sngi baar kila pynlong ia ka jingkynmaw burom ia ka lyngkhuh sngi iap kaba 163 jong u Woh Kiang Nangbah u khlwait ka ri ha u motdur ba shi rynieng uba don hajan jongka Shillong Civil Hospital.
Ha kane ka sngi ki nongialam sengbhalang na ka seng Khasi Students Union (KSU), Hynniewtrep Integrated Territorial Organisation (HITO), Federation of Khasi Jaintia & Garo People (FKJGP), NortEast Students Union (NESO) bad kiwei kiwei kila pynlong ia ka jingsngap jar kaba shipor bad la pynbud pat ia ka jingbuh syntiew ha u mot jong u radbah ka ri bad jaidbynriew uba la iakhun ban ioh ia ka jinglaitluid na ki bor synshar jongki phareng.
U President ka FKJGP u Bah Dundee Khongsit haba ai jingkren ula ong ba ha ki snem mynshwa ka jaidbynriew kala sei ia ki riewkhraw ka jaidbynriew u Kiang Nangbah ban iakhun ia ki dohlieh bad mynta ka jaidbynriew ka donkam ban sei ia ki samla kiba don ia ka jingnang jingstad bad ia ki khlur kiba lah ba synshar ia kane ka ri.
Ula banjur ruh halor ka jinglong jingman ka jingshah byrngem ka thain Lammihgi na ki kynhun shimet na Bangladesh bad ym dei ban shim sting bad ka long kaba donkam ban iada hashwa ba ka umsaw kan wan ban tyllep ia ka jylla bad pynpaw ia ka jingsngewsih bad haduh mynta ka sorkar India ka dang leh kuman ia ka jingdawa pyntreikam ia ka ILP ha Meghalaya.
U Chairman ka NESO u bah Samuel Jyrwa, ula ong ba ha ki ki snem ba la leit ka sorkar India ka la pyrshang ban shim ia u Woh Kiang Nangbah, u Syiem Tirot SIng ban pynlong ia ki kum ki riewkhraw ka ri ban long ki nongialeh lailuid ka ri India, hynrei ia ki mat ki jura ka jaidbynriew kum ka ILP, ka jingpynrung ia ka ktien khasi ha ka khyrnit ba phra ka leh matlah sah haduh mynta bad ka jaidbynriew ka dang hap ban iakhih iaskar ban dawa ia kine ki hok.
U President ka KSU u samla Lambokstar Marngar ula ong ba ka sorkar jylla tang ia uwei u briew, ka la set byndi ia u Tirot Sing bad ka la sdien phasi ia u Woh Kiang Nangbah, hynrei ka jingtieng ha kine ki sngi ka long ba ki mynder ri bad ki nongdie ri ki mut ban sdien phasi ia ka jaidbynriew baroh kawei.
Ula ong ba ki paidbah ki la dawa ia ki ain ki kanun kum ka ILP na ka sorkar India, hynrei sngewsih ba na jaka kane la wanrah pynban ia ki ain ki bym iadei dur bad ka rukom pyrkhat pyrdain bad ka jingshong shngain ka jylla bad la wanrah pynban ia ka Citizenship Amendment Bill kaba la kylla ain mynta ka CAA.
Ula ther ruh ia ki nongmihkhmat ka jylla kiba pyrkhat tang ia ka 5 snem, ym ia ka bha ka miat ki paidbah ka pateng ban wan, ki lapmiet ban leit shna drama ym ban shna polisi bad ki pyrkhat tang na ka bynta ka elekshon ban wan ym na ka bynta ka pateng ban dang wan.
