Nongstoiñ, Jymmang 14: Ka Hima Raidmynsaw hynnin ka sngi Saitjain, kala pynlong ia ka jingkynmaw burom ia ka jingiap ki 4 ngut ki rangbah ha ki ktang suloi ki Pulit ka Assam khatlai snem mynshuwa, da kaba leit buh syntiew ha u mot sah jing kynmaw bala tei da ka Hima hakhmat ka Iew Langpih.
Namar baka 14 tarik Jymmang ka iatakhuh bad ka sngi U Blei, ka Hima kala pynlong ia kane ka jingialang hynnin ka sngi bad ki paidbah na ki shnong ki thaw ka Hima kum ka Langpih, Iewnongma, Umtap, Madanjaiaw, Mawsikar, Umyiap bad kiwei kiwei, kila iamih ban iakynmaw burom ia kine ki rangbah.
Shuwa ban buh ïa ki syntiew, u bah Hindro Samakha sirdar barim jong ka Raidmynsaw, u la pynkynmaw ïa ki jingeh ba ki paitbah ka thaiñ ki ïakynduh na ka jingshah thombor ha ki pulit Assam haduh ba poi sha u pud ka jingsiat pathar ïa ki paitbah Khasi.
U la pynkynmaw ruh ba ka jingshah siat ïap jong kitei ki saw ngut ka la long ka jingduh kaba khraw ïa ki ïing ki sem jong ki khamtam eh ïa ki khun ki kti.Nalor kata u la ong ruh ba ka jing shah siat ïap jong kitei ki saw ngut ka dei ka history ka ban sah kynmaw pateng la pateng ha ki paitbah ka thaiñ bad kaba kum katei ka jingjia kam dei ban jia shuh nangne sha khmat.
