Shillong, Nohprah 30 : Ka Khasi Student Union (KSU) hynne ka sngi Nyngkong, kala kynmaw burom iaka lyngkhuh sngi iap ba 162 jong u Woh Kiang Nangbah ha u Motdur ba shi rynieng, uba ieng hakhmat ka Civil Hospital Shillong.
Haba kren ha kane ka sngi u President ka KSU u samla Lambokstarwell Marngar u la ong baka KSU ha u snem ba thymmai kan sa shong pyrkhat thymmai halor kiba bun tylli ki mat ba dang sahkut ha ka miej ka Sorkar Pdeng.
U Samla Lambok u la ong ba ki mat jingdawa ka Jylla khamtam ka jingdawa pyntreikam Inner Liner Permit (ILP), ka jingpyntreikam iaka MRSSA kala shu sahkut bad khamtam ka khyrdop ha Umling Ri-bhoi district kala kylla iingjah.
U la ong ba naka por shaka por ka KSU kala ju ïakren halor ka jingdonkam ban pyntreikam iaka ILP, MRSSA hapoh ka Jylla khnang ban shngain ki paidbah trai ri trai muluk.
“Ka Sorkar Jylla ka dang bteng ban kam ba ka la leh ia la ka jong ka bynta ban wanrah ia ka Resolution ban pyntreikam iaka ILP bad mynta ka shong ha ka Sorkar Pdeng ban ai jingmynjur, hynrei ka jingkylli ka mih mynta shano ka ain MRSSA bala thaw naduh 2016” buh jingkylli u samla Lambok.
Ula ong ba kum u Nongialam ka seng um banse ban kynthoh iaka Sorkar Jylla namar ka Sorkar kala pyrshang ban ialehkai iaki mat jingdawa kiba donkam ban pyntreikam naka bynta ka jinglong shngain ki trai ri trai muluk bad ka Jylla baroh kawei.
“Ha u snem ba thymmai, ngin shim ia ka rukom pyrkhat ba thymmai, ngin shim ia ki siejam ba thymmai ban pynbteng ia ki jingdawa, ban iakhih naka bynta ki mat kiba ka seng bad ki paidbah ka Jylla kila buh hakhmat ka Sorkar” u la ong.
Nalor kane u president ka KSU u la ban jur iaka jingdonkam ban wanrah iaka jingkhuid jingsuba haka thungkam thungjam hapoh ka Jylla.
“Ha ki bnai ban wan kan sa don ka elekshon MDC, hynrei la katta tylli ki snem ki District Council ki don hynrei ym pat ju ïohi mynno mynno ruh ba ki District Council ki thungkam daka ba khuid ba suba. Ngim pat ju ïohi ba ki pynbna paidbah ba laitkam ne interview. Nga kwah ban phah ka kyrwoh sha baroh kiba thmu ban iakhun elekshon, shim iaki lad lynti kiba bha tam namar ki samla ruh ki don ka hok ban thepkam” u la ong.
 hynne ka sngi Nyngkong, kala kynmaw burom iaka lyngkhuh sngi iap ba 162 jong u Woh Kiang Nangbah ha u Motdur ba shi rynieng, uba ieng hakhmat ka Civil Hospital Shillong.){kind=link}