Shillong, Risaw 29 : Ka Khasi Students Union (KSU) South West Khasi Hills, kala rakhe ia ka lyngkhuh sngi iap ba lai jong ka Longkmie Kong Splitiy Lyngdoh Langrin, kaba ieng pyrshah ia ka jingtih Uranium na Mawthabah-Domiasiat, South West Khasi Hills hynnin ka sngi Saitjain.
Ka Kong Spility Lyngdoh Langrin kaba dei na Domiasiat, kala kyntait ban die ia ka jaka kaba don kyrhai u marpoh khyndew Uranium, sha ka Sorkar halor ka nongrim ban pyrshah ia ka jingtih ia une u mar.
Kane ka Longkmie kala pruid dak ha ka histori jong ka Jaidbynriew kum ka longkmie kaba kyntait bad ialeh pyrshah ia ki jingbthah jong ki bor Sorkar, ban ailad ia ka Uranium Corporation of India Limited (UCIL) ba kan tih ia u Uranium na Domiasiat.
Ka Khasi Students Union (KSU) South West Khasi Hills kala pynbna ia ka sngi iap jong ka Kong Spility Lyngdoh Langrin ban rakhe noh kum ka ‘Anti-Uranium Day’ kata ha ka 28 tarik Risaw manla u snem, hapoh ka Jylla.
Ka kong Spility kala paw nam ha Jylla da ka jingkyntait ia ki jingtyrwa ba laiphew jait jong ka UCIL ba kan die ia ka jaka kaba don kyrhai u Uranium.
Ka Atomic Minerals Directorate kala lap nyngkong ia ka jingdon u Uranium ha u snem 1993 ha kane ka thain.
Haba ieng skhem ha ka nongrim ba kan nym die satia ia ka jaka sha ka UCIL ba kan tih ia u Uranium, ki kyntien jong ka kong Spility “Ka Pisa kam lah ban thied ia nga ia ka jinglaitluid” kala ai mynsiem ia ki nongshongshnong ka thain ban ieng pyrshah ia ki jingktah jong ka kam tih uranium.
Haba pynsawa lem ia kane ka juh ka sor, u President ka KSU South West Khasi Hills ula ong ba ka kong Spility kala ai mynsiem ia ka seng ban bteng ha kaban pyrshah iaka jingtih uranium na ka thain Domiasiat-Mawthabah.
