Kynmaw burom ka KSU ia ka lyngkhuh sngi ïap ba 83 u Soso Tham

Shillong, Nohprah 18: Ka Khasi Student Union (KSU) hynne ka sngi kala kynmaw burom iaka lyngkhuh sngi iap ba 83 snem jong u Soso Tham.

Ha kane ka sngi ki dkhot ka KSU South Khasi Hills kila leit buh syntiew ha u Mot jong u Soso Tham uba don hapoh ka shnong Saitsohpen kaba dei ruh ka shnong bala kha ia une u riewkhraw ka jaidbynriew.

Naka liang ka KSU NEHU Unit haka jingdon lang ki Executive Member kala pynlong ruh ka jingialang ban kynmaw burom ia ka Lyngkhuh Sngi iap ba 83 snem jong u Soso Tham ha u motdur jong une u Myllung uba don hapoh ka phyllaw jong ka skulbah NEHU.

Haba kren ha kane ka sngi u Vice President ka KSU u samla Biangbor Paliar ula ong, ba man la ka jaidbynriew ka don ia ki riewkhraw kiba ialeh iaki jingeh bad ki jingtynjuh daka wait hynrei u riewkhraw ka jylla ula ialeh da ki jingthoh kiba iai neh haduh mynta ban long ki nuksa iaka jaidbynriew.

U samla Biangbor ula ong ba une u riewkhraw lyngba ka thoh ka tar ula kren shibun shaphang ka mariang bad ula kren iaki kytien sneng halor ki jingeh bad kum u dkhot ka jaidbynriew, ym dei ban klet iaki ktien sneng u Myllung Soso Tham.

“Haba iadei bad ka jingdawa pynrung iaka ktien Khasi haka Khyrnit ba Phra, ngi la iohi ba ka Sorkar Jylla kala mynjur daka Resolution hynrei haduh mynta ka jingithuh iaka ktien Khasi kam pat urlong. Ngi buh ka jingkylli iaka Sorkar Jylla shaei kala poi ka Resolution ha ki khyllip mat ba mynta” la ong u samla Biangbor.

Ula kynnoh ba ka jingslem ban ioh jingithuh iaka ktien Khasi kadei namar ka jingbym shim khia ka Sorkar Jylla ban buddien ia ka Resolution bad ka Sorkar Pdeng.

Ula ong, na ka liang ka seng kan iai buddien bad ka Sorkar Jylla ban pynbor ba kadei ban tynruh iaka Sorkar Pdeng ban ai jingithuh noh iaka ktien Khasi.

Katba u samla Ruben Naijar ula ong ba ki dkhot ka seng bad ki dkhot ka jaidbynriew baroh kawei kidei ban bud nuksa iaka jingiaid lynti jong u Myllung Soso Tham, kata ban iai shah iaki jingeh bad ki jingtynjuh naka bynta ban im ka jaidbynriew.

“Ai ba kane ka mati ba u Myllung Soso Tham ula buh hapdeng jong ngi, kum ki dkhot ka seng bad ka jaidbynriew ngi dei ban bud nuksa” la ong u samla Ruben.