Shillong Naiwieng 01: Ka Khasi Hills Autonomous District Council (KHADC) hynne ka sngi Balang kala rakhe kynmaw burom ia ka lyngkhuh sngi ìap kaba 64 jong u Rev JJM Nichols Roy.
Kum ka dak jongka jingkynmaw burom ia une u radbah uba dei u nongthaw jongka Sixth Schedule jong ka riti synshar ka ri, u Chief Executive Member ka KHADC u Bah Pyniaid Sing Syiem, u Chairman ka KHADC Bah Lamphrang Blah, ki Executive Member, ki MDC ryngkat bad ki ophisar ka KHADC kila buh syntiew ha u mot sahnam jong u Rev Nichols Roy uba don ha phyllaw jongka Council.
U Chief Executive Member ka KHADC u Bah Pyniaid Sing Syiem, ula ong ba ka 1 tarik u Naiwieng ka long kaba kongsan ban kynmaw burom ia ka sngi iap jong u Rev JJM Nichols Roy uba long u Kpa jongka Sixth Schedule ne u Kpa jongki District Council bad udei ruh uba la noh bun bah u synniang ia ka jaidbynriew bad ia ka ri.
Ula ong, ba u Rev Nichols Roy u dei uba stad bad uba shemphang uba la lah ban pynkohnguh ia ki nongialam kiba stad ha ka ri India ban thaw ia ka Sixth Schedule kaba ieng ban iada ia ki riewlum kiba don ha ka ri lyngba ka riti synshar ka ri.
Ula ong ba ka KHADC kala khot ia ki Scholar bad Reasearch halor ki 18 tylli ki bynta jong ka jaidbynriew bad kila don haduh 90 ngut kiba la applai bad kiba ka Council kala pdiang ka long ia ki 40 ngut ba kin pynlong ia ka jingwad bniah.
U CEM ula pynpaw ia ka jingsngewsih ia ka jingmih ki kynhun kiba kwah ban pynduh noh ia ki District Council, katba kiwei pat ki jylla ki kwah ban don ia ka District Council bad ula kyntu ia kiba kwah ban pynduh ia ka District Council kin wan ban iakynduh ba kin ai ka jingbatai kaba bniah shaphang ka District Council.
Ula ong ba ka Council kala iakhun ia bun tylli ki mukotduma ban iada ia ka jinglong kyrpang jongka jaidbynriew bad kaba sngewtynnad ka long ba ka Council kala jop bun tylli ki mukotduma.
U Bah Lamphrang Blah ula ong, ba u Rev Nichols Roy ym tang ba ula trei shitom ban thaw ia ki District Council ha kane ka ri hynrei ula thaw ruh iaka Balang u Blei hapoh rilum Khasi-Jaintia.
Katba u Bah Bindo M Lanong uba long u Nominated MDC ula ong, ba dei lyngba ka jingtrei shitom u Rev Nichols Roy la ioh ia ka District Council ha u snem 1952 bad ula kyntu ia baroh ba dei ban bteng ban trei shitom ban pynneh pynsah ia ka District Council ha kata ka rukom ba kan long kaba don jingmut shisha bad kaba don ia ka nongrim.
 hynne ka sngi Balang kala rakhe kynmaw burom ia ka lyngkhuh sngi ìap kaba 64 jong u Rev JJM Nichols Roy.){kind=link}