Shillong, Nohprah 12: Ka jylla hynne ka sngi ka la kynmaw burom iaka jingdap 150 snem ka lyngkhuh sngi iap u nongialeh laitluid ka jylla Meghalaya u Pa Togan Nengminja Sangma ha Chisobibra ha Williamnagar.
Ia kane ka jingialang la pynshongkun da ka jingdon lang u Myntri Rangbah ka jylla Conrad K Sangma, u Chiefwhip ka sorkar Marcus N. Marak, Chairman ka Meghalaya Transport Corporation u badei ruh u MLA ka Rongjeng constituency Jim Sangma lem bad ki paidbah ka thain.
Haba kren ha kane ka sngi, u Conrad K Sangma u la pynkynmaw iaki kam riew shlur u Pa Togan Sangma bad u la ong ba kadei ka kamram jong baroh ban buddien iaki kam bah jong u Pa Togan khnang ba ki lawei ban wan kin tip iaki kam shlur une u khlur ialeh ka jylla.
“’Ka jingpynlong ia kine ki jait prokram kadei naka bynta ban kynmaw burom iaki kam bah ba u Pa Togan Sangma u la leh naka bynta ka jingioh laitluid ka jylla bad ka ri bad kum ki paidbah ka jylla, ngi donkam ban kynmaw bad burom ia u” la ong u Conrad.
U Conrad u la ong ba ka sorkar kan pynlong ia kum kine ki jait prokram ha kylleng ka jylla ban pynthikna ba ki paidbah khamtam ki khun samla ka jylla ki tip bha ia une u (Pa Togan Nengmin) riew khraw ka jylla.
U Conrad ha kane ka sngi u la pyllait ruh iaka Stamp jong u Pa Togan Nengminja Sangma bad u la iathuh ruh ba ka sorkar jylla kan tei ruh da ka ‘Pa Togan Nengminja Sangma Memorial Park’ hapoh ka shnong Chisobibra ha ka jinglut kaba T. 50 Lak.
Nalor kane, u Myntri Rangbah ka jylla Conrad K Sangma u la plie ruh ia u mawnongrim naka bynta ban tei iaka jingkieng na Rongon sha Rongbing Boldak shaduh Chekwebibra Road haka jinglut kumba T.7.81 klur.
U Myntri Rangbah u la plie ruh ia u mawnongrim ban pynheh iaka surok hapoh ka thain Williamnagar haka jinglut kaba T. 27 klur.
“Ka sorkar MDA kala shim khia ban wanrah shibun ki kam pynroi hapoh ka thain East Garo Hills bad ha Wilimnagar” la ong u Conrad.
