Shillong, Risaw 11: Ka Bethany Hospitals ha ka sngi baar kala pynlong iaka Dr. John L. Sailo Ryntathiang Memorial Oration kaba ba-ar, kum shi bynta ban kynmaw burom ia u synniang uba la noh da u nongseng jong ka Hospital u (L) Dr. John L. Sailo Ryntathiang.
Ha kane ka jingialang la ioh iaka jingren na u Dr. Kethoser Kevichusa, uba long u nongkren paidbah bad u nongthoh kot uba pawnam, uba la ioh pdiang ruh iaka First Gordon Graham Prize ha ka Naga Literature.
U Dr. Kevichusa ula kren ia ki nongrim kiba kongsan jong ka Bethany Hospital, Kaba kynthup iaka mynsiem ban iarap, ka jingsumar sukher bad ka jingtrei shitrhem naka bynta ka bha ka miat bad ula banjur ia ka jingdonkam iaka mynsiem ban iarap ha ka liang ka jingai jingsumar ym tang ha kaban sngewthuh iaka jingshitom jong kiwei hynrei ban don iaka mynsiem ban pynduna ia katei ka jingshitom bad ula iaroh ruh ia ka hospital ia ka jingshim ia ki sienjam ban don ia ka mynsiem iarap ha kaba iadei bad ka jingai jingsumar.
Ula pynpaw ruh ba watla ka hospital ka don ia ka thong hakhmat eh ban pynkhiah hynrei ban ai ka jingsumar jingsukher ruh ka long kaba kongsan bha bad ka jingai jingsumar sukher kam dei tang ban sumar ia ki nongpang hynrei kadei ruh ban pynlong ia ki nongpang ba kin sngewsuk mynsiem bad ba kin ioh iaka jingkyrshan.
U Dr. Kevichusa ula banjur ruh ia ka jingdonkam ban don iaka mynsiem kaba shitrhem ban ai jingsumar ha ka kam ai jingsumar bad ula ai jingmut ba ka sumar sukher ka lah ban iaid palat iaka jingkoit jingkhiah, ban pynsuk mynsiem bad ban phaikhmat ia ka jingkongsan jong ka jingim.
Ha kane ka sngi la ioh ruh iaka jingpynbyrngia na u Nise Meruno, ua dei u Nongkit Tiensyiem jong ka Yamaha.
