Shillong, Rymphang 25 : U Myntri Rangbah ka Jylla Conrad K Sangma ula pyntip ha Iingdorbar ha ka sngi Balang, ba ka jingdon ki Self Help Group ha Meghalaya kala kiew na ka 4000-5000 ha u snem 2018-19 sha ka 53,000 mynta, bad ka jingairam kala kot kumba T.1,100 klur kaba kynthup ia 90% ki longiing.
“Kumba 10-15 ngut ki kynthei ki donkam ha kaban thaw ia ki SHG, ym donkam satia ban register” ong u Conrad haba batai ba ka Meghalaya State Rural Livelihood Society (MSRLS) kala iarap ban pyniadei kam bad ki Bank. Ym kum ki nongshim ram shimet kiba hap ban buh bynda, “Haba ki leit da ka kynhun, kim donkam satia ban buh bynda…ki lah ban plie ia ka bank account bad thaw ia ka SHG” ha kaba ka jingaisut ia ka ram ka long 7 %.
“95% na ki ram la siew ha ka por kaba biang da ki SHG bapher bapher” ula ong haba pyntip ba ki Bani kila pynlait haduh T.733 klur sha ki kynhun bad palat 40,888 tylli ki SHG kila siew ia ka ram ha ka por kaba dei.
Baroh lang, u iathuh, jan kumba T.1,100 klur ka pisa kala don bad ki SHG, kaba ai jingmyntoi ia palat 53000 tylli ki kynhun ki Kynthei, ha kaba 70% ki dei ki ram na Bank.
U Conrad ula ai ka jingiaroh ia ka kynhun ka MSRLS bad ong “Ki Ophisar kila trei miet la bad sngi….kala don shisha ka jingialeh ki kynthei ban seng kam (movement) ha ki shnong ki thaw”.
U bynrap ba ka jingdon dkhot kala kiew na ka 40,000 ki kynthei ha ki phra snem bala leit sha ka 5.8 lak mynta, bad ka jingairam kala kiew na ka T.100 klur sha kaei kaba long mynta.
Haba jubab ia ka jingong u MLA ka Mawlai ia ka jingduna ki SHG ha Mawlai, u Myntri Rangbah ula ong ba ka jingthaw ia ki SHG ka dei ka mon lajong. “Ngi hap ban kynmaw ba ka jingthaw ia ki SHG ka shong beit ha ki briew kiba kwah ban iatreilang…ki jingpyrshang kila don ha manla ki block”.
Halor ka jingpynkhlain ia ka kamai kajih, u Conrad ula iathuh ba 42,323 ki dkhot kila long “Lakhpatis” bad ka Sorkar kala ialeh ban iarap pynlong ia ki kum ki “millionaires ba don pisa 10 lak”.
