Shillong, Jylliew 15: Ka Jingdawa pyntreikam ia ka Inner Line Permit (ILP) ha Jylla Meghalaya, ka dei ka kam kaba la kynjoh mynta sha ka 35 snem tam bad kane ka jingdawa ka dei kaba la lamkhmat da ka seng Khasi Students Union (KSU) kaba dang pynrhem ia ka jingiakhun haduh mynta mynne.
Ka Khasi Students Union kala sdang ban buh ia kane ka jingdawa naduh u snem 1987 ha ka jingialam jong u President ba ka Seng u Bah Bull Lyngdoh. Kane ka jingdawa kala mih hadien ki jingjia iaumsnam bad ka jingshah thombor ki trai paid riewlum ka Jylla (jaidbynriew Khasi-Pnar) ha ki bar jylla kaba la jia naduh u snem 1979 haduh 1987.
“Ka jingdawa pyntreikam ia ka ILP ka dei ka mat jingdawa lah ban ong ba ka dei kaba nyngkong eh jong ka KSU ban lah iada iala ki jong ki paradoh parasnam. Ka KSU naduh kitei ki snem, ka sngewthuh ba tang ka ain kaba lah ban long ka stieh iada ia ka Jaidbynriew kaba dang rit paid kaba lah ban shah taplup ha ka jingwan rung kyrthep ki Jaidbynriew bar Jylla ba hehpaid” ong u Samla Lambokstar Marngar, President ba mynta jong ka KSU haba iakren bad ka Shlem.
Hadien ki jingiakhih bad ki jingjia iaumsnam ba palat 32 snem ha Jylla, ban dawa ia ka ain ka ban iada ia ka Jaidbyniew trai riewlum, ka Sorkar Jylla ha u Nohprah 2019, da kawei ka sur kala shim ia ka rai (resolution) hapoh ka Iindorbar Thaw Ain ka Jylla ban dawa pyntreikam noh ia ka ILP hapoh ka Jylla bad kane ka rai ka dang sahkut hapoh ka jingbishar jong ka Ministry of Home Affairs ka Sorkar Pdeng.
U Samla Lambokstar ula ong “Ka jingpynslem jong ka MHA ban ai ka jingmynjur iaka Resolution ka Jylla ka pyni shai ia ka jingbym mon jong ka Sorkar Pdeng ban pyntreikam ia kane ka ain ha Meghalaya. Watla katta, ka KSU kan ym shongthait bad ha ryngkat ka North East Students Organisation (NESO), kan iai bteng ban pynbor ia ka Sorkar ba kan pynurlong noh ia ka jingangnud jong ki nongshongshnong ka Jylla.
Haba iathuh khana shaphang ka KSU, u samla Lambokstar ula ong ba ka jingseng ia ka KSU ka dei eh na ka bynta ban tehsong ia ka Jaidbynriew ba-iar ba kan long kawei la ki dei ki Khynriam, Pnar, Bhoi, War, u Maram, u Lyngngam bad kiwei kiwei.
“Ka mat ba nyngkong eh ba ka KSU ka shim ka dei halor ka jingeh ki samla ha ka pule ka dangle hynrei haba iohi ia shibun ki jingeh kiba don hakhmat jong ka Jaidbynriew, ka seng kala tyngrong halade ia ka lyngkor ban long ka waitlam ki paidbah ha kaban lah weng ia kine ki jingeh” ula ong.
Une u Nongialam ka KSU ula pynpaw ia ka jingbynniaw halor ka jingsahdien ka Jylla ha ka pule ka dangle watla kala dep kynjoh ia ka 50 snem bad ong “ Haduh mynta ngi dang don tang kawei ka skulbah sorkar ha Jylla kane ruh jong ka Sorkar Pdeng kata ka North Eastern Hill University (NEHU), ngim pat don ia ki Enginering College lajong lait na ki Polytechnic, ka Medical College lajong lait na ka NEIGRIHMS. Ngi peit kiwei pat ki Jylla khamtam ka Assam kaba don markhap bad ngi kala don kyrhai ki jaka pule ha ka liang pule bapher bapher”.
Une u Nongialam ka KSU ula iaroh ia ka jingiohi jngai jong ki Nongialam kiba hashuwa la ka dei ha ka jingdawa ia ka ILP ne ka jingpyrshah ia ka kam tih Uranium hapoh ka Jylla bad ong ba lymda dei ka jingieng pyrshah jong ka KSU ia ka kam tih Uranium, ymlah tip shuh ia kaei ka ban jia ia ki nongshongshnong ka Jylla na ka jinglynsop ka erbih uranium.
“Ka KSU kala ieng ban pyrshah ia ka kam tih Uraniumnaduh u snem 1988 bad kala iatakhuh ym shuh tang bad ki bor ka Sorkar Jylla hynrei bad ka Sorkar Pdeng ruh kumjuh. Hynrei da ka jingbym kynran dien bad jingpynjur ia ki jingdawa, khatduh ka Sorkar Jylla kala shim rai ban khylliap noh ia ka lynnong tih Uranium na Jylla” ula ong.
