Shillong, Naiwieng 17 : Ka Jylla Meghalaya kala kiew sted bha ha ka jinglah ban pynpoi umbam umdih sha ki longiing ha ki shnong nongkyndong, hynrei kane ka jingmyntoi ka don pat ha ka jingma namar ka jingkylla ka suinbneng ka nang jur.
U Myntri ka Public Health Engineering Marcus M Marak ula pyntip ba 82% na ki longiing ha ki jaka Nongkyndong ka Jylla kila ioh ia ka kor um hala iing lyngba ka Jal Jeevan Mission, haba khein ia ka kum ka jingjop ba sah jingkynmaw-kaba ai ia ka jingim sha ki nongshongshnong ba sha kyndong eh ka Jylla.
Hynrei u Myntri ula ong ba ka jingkylla ka suinbneng kala buh pat ia ka jingma namar ba bun ki tyllong um hapoh ka Jylla kila nang tyrkhong. Ula iathuh ba kat haduh u 2019, haduh 30% ki tyllong um kila ring tyrkhong, ka jinghiar kaba ktah beit beit na ka jingkylla ka suinbneng.
“Ka jingkiew ka dei kaba shisha hynrei ka jingma ruh kala nang jur” ula ong haba pynpaw ba shisien ka por, ki umpohliew bad ki wahduid ki bun bha ha Jylla hynrei ka jingduh noh jong ki, kala nang jur.
Hynrei u Myntri ula ong ba ka jingmih shakhmat ki shnong ki thaw ban tyngkai ia ka um kala ai ka jingkyrmen ia ka Jylla ban iakhun ia ki jingeh ki ban mih hadien habud. Ula ong ba ka Sorkar kala thaw ia ki Village Water Committee kiba la thung hapoh ka mishon jong ka bad kine ki committee kila shimkhia ban test ia ka jingkhuid ka um, maramot ia ki tyllong um bad kiwei kiwei ki project ban tyngkai ia ka um.
Ban tem ia ki jingktah na ka jingkylla ka suinbneng, ka Sorkar kala thung ia ka Climate Change Council, kaba khlieh hi da u Myntri Rangbah, ban pynrben biang ia ki khlaw ba don ki tyllong umbam umdih ne ki catchment area, pynjur ia ka kam jingthung dieng, pynkhlain ia ki kor ki bor ban pyllang ia ka umslap.
