Kynjah jar ka NEHU ba khangdam ki samla pule | Iaid beit ka jingia shong shah thngan

Shillong, Naiwieng 06 : Ka North Eastern Hill University (NEHU), hynne ka sngi Balang, kala kynjah slam slam namar ka rai khangdam jong ki samla pule ia kane ka skulbah, kaba la sdang treikam naduh hynne ka step.

Baroh ki kamra klas bad kumjuh ruh ki Ophis kila thylli na ka jingbym don ki samla pule bad ki nongtrei.

Kane ka jingiakhih ki samla ka dei kaba la kyrshan ruh da ki nonghikai ka NEHU-ka NEHUTA, ka MeTTA bad kumjuh ruh da ki Nongtrei jong ka skulbah.

Ki samla pule kiba don hapoh ka lama jong ka NEHUSU bad KSU-NEHU Unit, kila pyniaid beit shakhmat ia ka jingiakhih da kaba iashong shah thngan khlem pud hakhmat ka Administrative Block jong ka skulbah.

Ki don ruh ki samla pule kiba la pynieng syndon da ki dara (tent) ban sahmiet ha ka jaka ba mar pyrshah ka Administrative Block.

Ha ka jingleit jurip, la lap ba ym don kawei ruh ka Department jong ka NEHU ba kan don ka jingshim klas ia ki samla.

Lah ban kdew hangne, kane ka jingiakhih ki samla pule ka dei kaba la pynlong halor ka nongrim ka jingsngap mynthi jong u Vice Chancellor ban pyntreikam ia ki mat jingdawa, kiba la buh hakhmat jong u naduh u snem 2022.

Kine ki mat jingdawa ki kynthup ia ka jingdawa wengkam mardor ia u Registrar, u Deputy Registrar, u OSD bad u Incharge jong ka Guest House, nalor ki jingdonkam jong ki samla pule ha ki hostel bad kiwei kiwei.