Shillong Jymmang 30: Ka Khasi Students Union kala pynpaw iaka jingsngew kyndit ia ka jingthmu ka sorkar jylla ban phah pyniasoh ia baroh ki College ka jylla sha ka Williamson Sangma State University khlem da iasyllok bad ki nongpyniaid College, ki nonghikai ne ki samla pule.
U General Secretary ka KSU u samla Donald V Thabah ula ong, ka seng hadien ba kala iohi lyngba ki lad pathai khubor, ba ka sorkar ka thmu ban phah pyniasoh noh ia baroh ki college ka jylla sha ka Williamson Sangma State University, ka sngew kyndit namar ka sorkar ka khlem iathuh eiei hato ka la dep ia syllok ne em bad ki nongpyniaid bad samla pule college ka jylla halor kane ka rai.
“Kane ka rai ka dei kaba ktah ia ka im ka iap ki samla pule bad donkam ia ka sorkar ban ia syllok shwa bad baroh ki riewpaidbah khamtam ki nongpyniaid college, ki nonghikai, ki kmie ki kpa, ki samla pule bad ki seng bapher bapher ha shwa ban shim ia kum kane ka rai” ong u Donald Thabah.
“Ka sor Shillong ka dei ka nongbah jong ka jylla bad ka KSU ka sngew ba ki bor ba dei khmih bad pyniaid ia ka pule puthi ki dei ban don ha Shillong ban pynsuk ia baroh lang” ula ong.
Ka KSU ka pynkynmaw ia ka jingjia ha u snem 2005 ha kaba kala don ka jinghuri hura kum ka jinglait tuh ki kot jingkylli bad ka jingbym poi ki kot jingkylli (ha sector 1) kaba pynlong ia ka seng ban dawa Regional Administrative Office jong ka MBOSE ha Shillong kaba la poi haduh u pud jong ka jingiakynad kaba jur ha kaba da ki phew ngut ki samla Khasi kynthup ia ki dkhot ka KSU kila shah kem bad mynsaw jur ha ki jingiakhih. Ka jingwan jong ka Regional Office ka MBOSE ha Shillong ba khlieh da u Executive Director kala iarap shibun ia ki samla ba pule ha ki college bapher bapher.
“Kyntang ia wai ka KSU ka pynsngew ba kumba 70% ki college ki don ha ka thain Mihngi jong ka jylla kata ha ka Bri U Hynñiewtrep, kan ym iahap ban iasoh (affiliate) bad ka University kaba don sha kawei pat ka thaiñ kaba jngai na ka nongbah bad ka sorkar kan hap pynshai paidbah bha haba ka shim kum kine ki rai ban lait na ka MBOSE 2.0” la pynkut u nongialam ka KSU.
