Shillong, Jylliew 05 : Arngut ki shipara kila mynsaw jur na ka jingshah dung da ka tari ha ki arngut ki Nongtuh, kiba pyrshang ban kyndang ban tuh tiar na kawei ka karkhana kali kaba don ha ka thain Mawlai Nongkwar, Block-13.
Kane ka jingjia kala jia hynne ka step phyrngap sngi Palei. Ha kane ka jingjia, la ioh ruh ban kem ia uwei napdeng kine ki nongtuh katba uwei pat ula ioh phet.
Kat kum ka khubor Pulit, kine ki arngut ki nongtuh kila wan da kawei ka local taxi ba don u nombor ML-06-5732 bad ki dei kiba rah ia ki tiar ki tar kiba mynsaw, ban leh ia ki kam runar.
U Rangbah Dong ka Mawlai Nongkwar Block-13 Bah Wanphrang Swer u iathuh ba katba kine ki nongtuh ki dang pyrshang ban khura ia ka karkhana, arngut ki shipara, ba sah marjan kila iohsngew bad ia mih ban kem ia kine ki nongtuh bad ha ka jingialeh, kine ki nongtuh kila dung ia kine ki shipara da ka tari.
U iathuh ba uwei na kine ki shipara ula shah dung na ki bynta ka lbong bad uwei pat na ka kti bad baroh arngut kila mynsaw jur bad la kit ia ki sha Robert Hospital ban ai jingsumar.
Kine ki arngut ki shipara ki kyrteng u Wallamkupar Warjri ba 31 snem bad u Mebanrapbor Warjri ba 29 snem, kiba dei ki khun u Bah Ioanis Lyngdoh.
U iathuh ba ha kane ka jingjia la ioh ruh ban kem ia uwei napdeng kine ki nongtuh katba uwei pat ula lait phet. Ia ka kali ruh la ioh ban kurup bad la aiti noh sha ki Pulit.
Une u nongtuh ba shah kem u kyrteng u Debarlang Kharmusulmar ba 29 snem ka rta, khun jong u Bah Victor Thongni, uba shong ba sah ha Mawsyrpat, Nongstoin, West Khasi Hills District.
Ia une u nongtuh la aiti noh sha ki Pulit bad ka jingtohkit mynta kala iaid shakhmat. Ka jingthwet ia u nongtuh ba laitphet ka dang iaid shakhmat.
Shuwa kane ka jingjia, dang shen ki briew ka thain, kila ioh ban kem ia arngut ki nongtuh kiba rong tuh ia ki tiar na ka dukan Nari Essential Store, kiba wan da ka scooty.
Ia kine ki nongtuh ruh lah aiti sha ki Pulit ba kin leh ia kaba donkam.
