Shillong, Nohprah 29 : Ka Khasi Students Union (KSU)-Laban Circle kala leit kyndang ia kawei ka Shelter Home kaba don ha Kenches Trace (Harrison Bridge), kaba dei ka ktem iadih droks bad kam awria bad kynthei bad shynrang.
Kane ka jingkhynra ka KSU kala jia hynnin ka janmiet sngi Palei, hadien ka jingsaphriang jong ka video ha ki rynsan social media, kaba pyni ia katto katne ngut ki samla kynthei bad shynrang kiba dang ia injek droks ha kane ka Shelter Home.
Kat kum ka jingong ka KSU, kane ka Shelter Home ka dei kaba la shu ieh lyngkrang da ka Shillong Municipal Board (SMB) haduh ba kala kylla long ka ktem dih drok bad leh kam awria.
Ka KSU Laban Circle ha ka jingsynran ki Pulit ka Laban Police Station, kala khynra naphang ia kane ka Shelter Home bad ioh kurup ia ki nar injek bad ki tyndong plastic ba ju buh droks.
Hynrei ha kane ka jingkhynra, ym shym la lapdien satia ia ki briew. Ka KSU ka pyntip ba kala ioh jingtip ia ka kyrteng jong kine ki kynthei bad shynrang kiba ia injek droks bad ia kine ki kyrteng la aiti sha ki Pulit ba kin leh ia kaba donkam.
Ka KSU-Laban Circle kala pyntip ba kan sa leit buh da ka dorkhas ha u Chief Executive Officer (CEO) ka Shillong Municipal Board (SMB) ba dawa ban buh noh da ki bor pahara ha kane ka jaka nalor ban kyndang noh ia kine ki briew kiba pynlong ktem sniew ia kane ka jaka.
