Nongpoh, Nailur 06 : Ka Sorkar Assam kala kyndang bad pynpra lut ploin ia baroh ki Iing kiba shna be-ain harud jong ka surok bah na Jorabat shaduh Byrnihat (kiba don sha ka liang ka Assam) ban lah tem ia ka jingshlei um jong ka sor Guwahati.
Kane ka jingkyndang ia kine ki Iing kala sdang naduh ka sngi Palei. Ki bor ka Sorkar Assam bala ialam da ki Magistrate, ki Heh Pulit bad CRPF, kila leit da ki puh shilum ban kyndang naphang ia kine ki iing bad dukan ba shna be-ain.
U Ringku Deka, uba na 13 mer Assam, ula iaroh ia ka Sorkar Assam kaba nud ban shim ia kane ka sienjam ban kyndang ia ki iing beain naduh Jorabat sha Byrnihat. Ula ong ba kine ki briew ba sah ha kine ki iing bad dukan ki dei ki bym ithuh ithaw bad ki bym lah ruh ban pynthikna ki dei kiba wan nangno ka jaka.
Namar kane ka jingjia, ki kynhun Sengbhalang ka Them Ri-Bhoi kila peit pyrman bha namar ka jingsheptieng ioh ba kine ki briew ba shah kyndang ha Assam, ki wan phet bad wad jaka riehtngen ha Meghalaya.
Ka seng FKJGP bad KSU Byrnihat Circle, kila pynpaw ia ka jingbym shngain na katei ka sienjam bala shim da ka Sorkar Assam bad bthah ia ki dkhot ba kin peitngor bha ban nym ailad ia ka jingwan rung tuh.
U Vice President ka FKJGP North Khasi Hills bad General Secretary ka KSU Byrnihat Circle, kila kyntu ia ki bor shnong, ki samla, ki nongshong shnong,ki nongaiwai iing ba kim dei ban pdiang ia ka jingwn riehtngen jong kitei ki briew ba shah kyndang na Assam namar la sngewthuh shai ba kine ki briew ki dei ki bym don kot don sla bad ki dei ki poi wir-kaba la pynbor ia ka Assam ban shim ia kat kane ka sienjam.
 ban lah tem ia ka jingshlei um jong ka sor Guwahati.){kind=link}