Baghmara, Lber 09 : U Myntri Rangbah ka Jylla Conrad K Sangma ha ka sngi Nyngkong ula pyntip ba ki project kam pynroi ba palat T.5000 klur kila iaid mynta ha South Garo Hills, haba iashimbynta ha ka “Our Magnificent Vision 2032 | Meghalaya” kaba la pynlong ha Baghmara ban rakhe ia ka jingdap phra snem ka Sorkar MDA.
Haba ai jingkren ha ka jingialang ha Sports Complex, u Conrad ula ong ba ka Sorkar kala pynleit jingmut eh ha ki kam pynroi kiba kynthup lang ia baroh bad kiba iai neh, khamtam ha ki jaka nongkyndong bad ki jaka khlaw, haba pyntreikam ia ki project kiba thmu ban nang pynitynnad ia ki jingtei, kyntiew ia ka kamai kajih bad ka jingai jingshakri.
Ula ong ba ka Sorkar kala kynshew bun bha ha ki kam bapher bapher hapoh ka district ha kine ki phra snem bala leit noh, kynthup ia ka song T.354 klur ha ki project ka Public Health Engineering, T.235 ha ka pule puthi bad T.90 klur ha ki kam ban kyntiew ia ka jngohkai pyrthei.
Hapoh ka jingpyrshang ban kyntiew ia ki kam jngohkai jong ki shnong ki thaw, T. 3.16 klur lah ai sha ki nongioh jingmyntoi ba kin shna ia ki homestay.
U Conrad ula ong baki project tei jingtei kiba shongdor T.2144 klur lah pyntreikam ha ka district hapdeng kine ki snem.
“Ka South Garo, kaba ju iabna shisien ka por kum ka district ba shah iehbein tam, kala nang kylla suki suki mynta kum kawei na ki district bala buh hakhmat eh” ong u Conrad haba bynrap ba ka Sorkar ka iai kut jingmut ban pynthikna ba ka jingkiew ka ioh ka kot kan kylla long ka jingmyntoi kaba khraw ia ki trai nongshongshnong.
Ula pynbna ruh ba ka Greater Baghmara Water Supply Scheme Phase-II ba T140 klur, bala beit da ka Ministry of Development of North Eastern Region, yn sa pyniaid hakhmat noh shen da ka jingkhot ia ka tender.
Ha kane ka prokram, u Conrad ula sam ia ki skhim hapoh ka Green Meghalaya bad ka FOCUS +. Haduh 30 ngut ki nongioh jingmyntoi kila ioh pdiang ia ki song jingiarap ba T.1.53 klur hapoh ka Green Meghalaya bad 20 ngut kila ioh ia ka jingiarap song pisa hapoh ka FOCUS+.
Kiwei pat kiba la ai jingkren ki kynthup ia u Myntri ka Tnad PHE Marcuise N Marak bad kiwei kiwei.
