Guwahati, Risaw 12 : Ha ka jingjia kaba sngewsih, saw ngut ki briew kila iap bad palat 70 ngut kila mynsaw haba hynriew tylli ki coach jong ka North East Superfast Express ba wan na Assam, kala kylla ha Buzar District ka Bihar ha ka miet sngi Balang.
Kane ka jingjia kala jia ha ka por 9:35 baje hajan ka Raghunathpur Railway Station.
Kat kum ka jingiathuh ki Heh Railway, kane ka train ba 23 tylki ki coach (No.12506) kala mih na Anand Vihar Terminal, Delhi ha ka por 7.40 baje mynstep ha ka sngi Balang bad ka dei kaba wan sha Tinsukia ha Assam.
Ka kynhun ai jingiarap na ka Danapur Division jong ka East Central Railway (ECR) kala her wutwut sha katei ka jaka ban ai jingiarap ia ki paidbah.
Namar kane ka jingkylla, ka lynti iaid jong ki rel kaba shah ktah lut bad ki rel kiba dei iaid na kane ka lynti,kila hap ban shim da kiwei pat ki lynti iaid na kiwei ki jaka.
Haba thoh ha X (Twitter ba mynshwa), u Myntri ka Tnad Railway Ashwini Vaishnaw ula ong “Ka jingiarap ka dang iaid shakhmat ha kane ka jingkylla ka rel ha Buxar. Ka NDRF, SDRF, ki bor District, ki Heh ka Railway bad ki trai shnong kila iatreilang kum kawei ka kynhun. Ia kiba mynsaw la pynkit noh sha hospital”.
Ula ong ruh ba ka jingsei iaki briew na kane ka rel kan sa dep noh shen bad hadien yn sa shna pynbiang bha biang ia ka lynti iaid (track).
Ha kajuh ka por, ka Tnad Railway kala pynmih ia u helpline number na ka bynta ki paidbah ba kin wan jingtip : Patna station (PNBE)-9771449971, Danapur station (DNR) – 8905697493, bad Ara station (ARA) – 8306182542.
Ka Indian Railway kala hap ban pynsangeh ia artylli ki rel ban pynkylla lynti iaid ia 21 tylli ki rel namar kane ka jingjia ha Buxar.
Ka Kashi-Patna Jan Shatabdi Express (15125) bad Pathna-Kashi Jan Shatabdi Express (15126) kila hap ban sangeh iaid namar kane ka jingjia, ong ka East Central Railway zone.
