Nongstoiñ, Rymphang 19: Ar ngut ki samla kynthei kiba dei ki dkhot jong ka kynhun rwai Choir jong ka Balang Presbyterian Umdang, ki la khlad noh hadien ba ka kali kaba kit ia ki lem bad kiwei pat ki para nongrwai Choir, ka la kylla ha ka shnong Mawkhumkha, ka jaka ba pynlong ia ka jingiaseng Ri Lyngngam Presbytery.
Kiba la khlad noh la tip kyrteng kum ka Dearly Daffudil Rashir 18 snem ka karta bad ka Sonamika Ryntong 17 snem ka karta.
Kane ka jingjia ka la jia ha ka step sngi u Blei ha ka por kumba 8:30 ei ei mynstep, ha kaba katei ka kali Bolero pick up kaba don ia u number ML07 B 9110, ba la niah da u Shempatkupar Mawsor, ka la mih na Umdang ryngkat 34 ngut ki nongleit jingiaseng, kiba kham bun na ki, ki dei ki dkhot nongrwai Choir jong ka Balang Presbyterian Umdang.
Hynrei, la ong mar ia poi ha Mawkhumkha, katei ka kali ha ka jingbakla bad jingbym lah shuh ban teh lakam da u nongniah, ka la leit tynrah ia ka top um kaba don ha katei ka jaka bad kylla khongpong.
Kiwei pat kiba don ha katei ka kali ki la mynsaw jur ha kane ka jingjia bad ki riew paidbah kiba don ha katei ka jaka, ki la iarap ban pynkit mar mar sha ia kine kiba mynsaw ki jaka sumar ha Riangdo CHC bad Nongstoin Civil Hospital bad ia kiba la kham mynsaw jur eh la pynkit noh sha Shillong.
La ong ruh ba ar ngut ki la kham mynsaw jur bad don hapdeng ka jingbym tip briew bad don mynta hapoh jingsumar ICU.
Hadien kane ka jingjia ba sngewsih, na ka liang ka jingiaseng Presbytery ha ka jingiaseng kaba nyngkong, ka la pynlong noh tang ia ka jingiaseng duwai bad kiba bun ki la mareh sha katei ka jaka ba jia ka jingjia ban iarap ia ki lanot.
Ha kajuh kane ka sngi, ha kajuh ka por ka la don ruh ka jingkylla kali ha shnong Nongsba Maweit, ha kaba kawei ka kali sumo kaba don ia u number ML05 1251, kaba kit ia ki nongleit jingiaseng ban leit sha ka jingiaseng Presbytery Nongpyndeng ha Mawtynrong.
La ong ba shwa ba kane ka sumo ka la kiew ia u thiep shwa ban poi ha Nongsba, hynrei la ong ba namar ka don ka jingthut ha ka break, kumta ka la kylla noh ha katei ka jaka,
Hynrei, donbok ba ha kane ka jingjia ki 8 ngut ki riew kynthei kiba don hapoh ka kali ki la shu mynsaw malu mala ha ki bynta jong ka met. Tangba hap pynpoi pat ia ki sha jaka sumar ha PHC Maweit na ka bynta ki jingmynsaw. Katba ar ngut ki rangbah ba kynthup ia u nongniah ki khlem lei lei satia.
