Shillong, Jymmang 11 : Ka jingiakynad hapdeng ki Pnar bad ki jaidbynriew Karbi kala kyan biang mynta ha shnong Khanduli, West Jaintia Hills District hadien ka jingiapyni bor markylliang hynne ka sngi Palei.
Ka tyllong khubor ka pyntip ba ka huri hura kala jia hynne ka sngi hapdeng kine ki ar Jaidbynriew, kaba la wan jia hadien ba ka Dorbar Shnong Khanduli kala rai ban khang ia ki Karbi ban wan iaid lyngba na ka Shnong.
Kane ka rai kala mih ruh hadien ba ka kynhun ki Karbi kala byrngem ia ki Pnar ba kim bit ban leit sha ki jaka rep jong ki.
Kane ka huri hura kala lam ruh sha ka jingialun maw, ka jingiashoh bad ka jingwiang ding ia artylli ki sem phlang.
Ka khubor ba iathuh ba arngut na ki paid Karbi kila mynsaw jur bad la pynkit mar mar ia ki sha ka Hospital kaba don ha Hojai ba kin ioh ia ka jingsumar.
Ha kane ka jingjia, ka kali jong u Superintendent of Police ka West Jaintia Hills ruh kala shah kawang maw ha ki paidbhur kiba la kem bitar na kane ka jingjia.
Hynrei donbok ba u Superintendent of Police ula lait phet khlem kano kano ka jingmynsaw hynrei ka kali jong u, kala julor malu mala.
Ha kajuh ka por, ki bor pyniaid district jong ka Meghalaya bad Assam kila shim ia ki sienjam ban tehlakam iaka jinglong jingman bad kila pynkhlain ruh ia ka jingpahara ha ki shnong khappud jong kane ka thain.
