Guwahati, Nailar 09 : Palat 1000 ngut ki nong Bangladesh, kila wan iakren ia ki shipai Border Security Force (BSF) ban pan jaka riehtngen ha India ha ki bynta jong ka khappud India-Bangladesh ha Coochbehar District ka West Bengal, ong ki shipai BSF hynne ka sngi Thohdieng.
Hynrei, ia kine ki nong Bangladesh bala ngeit ba ki dei ki Hindu, la khynniat biang sha Bangla da ki shipai BSF ha ryngkat ka jingiarap jong ki shipai Border Guards Bangladesh (BGB).
“Haba iatakhuh bad kane kakynhun, ki shipai BSF kila pyntip mar mar ia ki BGB, ban ialam noh ia kine ki nong Bangladesh shala ka jong ka Ri bad ban pynthikna ba ka jinglong jingman kan nym pynmih ia ka huri hura” ong ki heh BSF ka Guwahati Frontier.
Ki Heh shipai kila ong ba kane ka jingjia ka dei ka jingtynjuh ba thymmai ia ki BSF, kiba la shah pynkhamti ia ka bor ban pahara ia ka khappud ka Ri Bangladesh bad Pakistan.
“Ka jingkloi bad jinglah shim rai wut wut jong ki BSF ha kaban iatreilang bad ki bor pyniaid District, ki long kiba donkam ban lah tehkam ia ka jinglong jingman bad ban pynbeit ia kane ka kam” kila ong.
Ha kajuh ka por, ka Vishva Hindu Parishad (VHP), Uttar Purba Prant Secretary Brajajyoti Sarma ula kyntu ia ka Sorkar India bad ia ki ri ka Pyrthei ban pynthikna ia ka jingshngain jong ki paid Hindu ha Bangladesh namar ka jingsniew ka jinglong jingman ha katei ka ri.
Haba iakren bad ki lad pathai khubor ha Guwahati, u Sarma ula kdew “Hadien ka jingiehnohkam ka Sheikh Hasina bad jingphet krad napoh ka Ri, ki riew pynhuri hura kila shimti ia ka synshar khadar bad kam don shuh ka jingshongsuk shong shngain hangtei. Ki paid Hindu ba sah ha Bangladesh kila shah thombor bad shah pyndik ha ki kynhun bapher bapher” ong u Sarma.
Ula ong ruh ba bun ki jaka mane blei, ki jaka treikam bad ki iing jong ki Hindu kila shah pynjot pynjulor ha Bangladesh.
“Kum kine ki jingjia kila mih na baroh ki District ka Bangladesh. Ki Temple kila shah pynjulor jubor bha bad wat ki jaka thang briew ruh ym shym la map shuh” ula kynnoh.
Ula ong ba ka Ri India kam lah ban shu phai lyndet ia kane ka jinglongjingman bad ka hap ban iarap ia ki phetwir na kylleng ki ri ka Pyrthei.
Ka VHP kala kynty ia ka Sorkar India ban shim ia ki sienjam kiba treikam mardor ban pynthikna ia ka jingshngain jong ki ritpaid ha Bangladesh.
 ban pan jaka riehtngen ha India ha ki bynta jong ka khappud India-Bangladesh ha Coochbehar District ka West Bengal, ong ki shipai BSF hynne ka sngi Thohdieng.){kind=link}