Shillong Lber 30: U President ka BJP Meghalaya u Rikman G Momin hynne ka sngi Saitjaiñ ula ong ba baroh ki briew ki kwah ba u Narendra Modi yn long biang u Myntri Rangbahduh ka ri.
“Baroh kin vote ia u Narendra Modi ha ka sien kaba lai” ong u Momin haba iakren bad ki nongthoh khubor hadien ba la wai ka jingialang kaba la lum da u National President ka NPP u Conrad K Sangma uba long ruh u Myntri Rangbah ka jylla.
U President ka BJP ula ong, “Baroh ki ‘Karyakartas’ kila wan iashimbynta ha ka jingialang ia kaba la wan ruh da u Myntri Rangbah ka jylla bad ngi ngin ai ka jingkyrshan kaba pura ia ki kyrtong ka NDA”.
Ha kaba iadei bad ka jingdawa ba udei ban hiar shuki noh, u Momin ula ong, “Kan shong ha ki nongialam kiba ha khlieh la nga hap ban iehnoh ngan iehnoh. Ngan leh katkum ka rai kaba shim da ki nongialam kiba ha khlieh”.
“Hooid, hynrei ka long pat kumne, ba kadei namar ba kila trei shitom bha miet bad la sngi bad kumta kila pyrkhat ba kadei ka jingkitkhlieh ka jong nga ban ym pynieng kyrtong, kadei ka rai kaba la shim da ki nongialam kiba ha khlieh eh ia kaba ngam lah ban leh pyrshah” ong u Momin.
Ula ia thuh ba kan sa don ka prokram ia ka jingwan pyniasoh sha ka seng BJP ha ka por elekshon bad hadien ka elekshon.
Ha kaba iadei bad ka jingialap elekshon na ka bynta ka NPP, u President ka BJP ula ong, ba kim pat ioh ia kano kano ka jingpyntip na ki nongialam kiba ha khlieh jongka BJP.
Katba u nongaiktien ka BJP u Bah M Kharkrang ula ong, “Ngam lah ban sngewthuh balei phi ia pynmih ia kane ka mat ban iehnoh kam (Resign) man la ka por. Dang shen nga lah dep ban ai ka jingkren bad pynshai ba kadei ka jingsngew tang jong ki katto katne kiba leh phoi hapoh ka seng bad ngi la lum ia baroh ki mandal president bad kila ong em, kumta nga kyrpad ia ki nongpathai khubor ba ha ki por kiban wan, haba ki pynmih ia kum kitei ki khubor kidei ruh ban da kdew ia ka kyrteng jong kitei ki nongtrei ka BJP kiba ai ia ka kyrwoh khubor, namar kam long kaba dei”.
Ula ong, ba u President yn leit iakynduh ia ki nongtrei ka party ha rilum Garo Hills bad ban pynsngewthuh ia ka rai kaba la shim na ka bynta ban kyrshan ia ka NPP.
“Kajingdawa ban hiar shuki noh, kadei tang na ki katto katne ki dkhot jong ka seng bad ngan iathuh ia phi. Lada phi pynmih ia ka kyrteng kin dei tang kito kiba leh phoi ne ki bym sngewhun na ka seng” ula ong.
