Kwah u CM ka Meghalaya ban don da ki Policy ba kyrpang ha man ki Jylla ha ka Act East Policy

Thrang ki kompani ba Germany ban wan sengkam ha Meghalaya

Shillong, Lber 25 : U Myntri Rangbah ka Jylla Conrad K Sangma ula pynpaw ia ka jingdonkam ban don da ki policy treikam ba kyrpang hala ki jong ki Jylla ha ka Act East Policy bad ong ba ka policy ba kumjuh (uniform) kan ym treikam bha satia na ka bynta ki Jylla ka thain Shatei Lam Mihngi kaba iapher kawei na kawei pat.

Haba plie ia ka 7th Act East Business Show kaba sdang hynne ka sngi ha Shillong, u Conrad ula tyrwa ba man ki Jylla ki dei ban pynleit jingmut ha kino ki kam ba ki kwah bad ka jingiatreilang bad ki rib a marjan kaba iaid kat kum ka jinglong ki jaka bad ka jingkhlain ha ka ioh ka kot.

“Ka jingdon ka Meghalaya ia ka khappud ba jrong bad ka Bangladesh ka plie lad plie lynti bha ia ka jingiatreilang na shiliang sha shiliang khappud, katba kiwei ki Jylla ki lah ban don ka jingiadei kaba khlain bad ka Myanmar lane kiwei ki ri ka South East Asia. Ki buit treikam kiba da pynwandur bha kan ai ia shibun bah ki jingmyntoi” ula batai.

Ia kane ka business show la pynlong da ka Indian Chamber of Commerce ha ka jingiatreilang bad ka Sorkar Meghalaya, da ka jingthmu ban pynkhlain ia ka jingiadei bad ki Ri BBIN bad ASEAN.

Kane ka business show kaba khring ia ka jingwan iashimbynta ki Heh Sorkar na ki Ri ASEAN, ki nongsengkam, ki nongrahktien syiem bad kiwei kiwei, ka pynleit jingmut hakhmat eh ha ka liang ka jingiatreilang ban kyntiew ia ka ioh ka kot, ka lad ban sengkam sengjam bad ka jingwanrah ia ka roi ka par kaba neh slem hapoh ka thain Shatei Lam Mihngi.

U Conrad ula ban jur ia ka jingkongsan ban don ka jingiatehlok kaba bun bun snem. “Ha ngi, kum ka Jylla bad kum ka Ri, ka jingtei ia ka jingiadei kaba khlain ka dei u shabi. Ki jingialang kum kine ki lah ban wan bad leit, hynrei ka jingiadei, ka jingialong paralok bad ka jingiasngewthuh markylliang kaba mih na ki, kin iai neh bad ban rah lang sha la ki jong ki jaka” ula ong.

U Myntri Rangbah ula kren ruh halor ka jingkiew sted bha ka ioh ka kot ka Jylla Meghalaya ha kaba ka GDP kala kiew haduh 13.5% ha kine ki snem bala leit, kaba tam ia ka national average. Ula ainam ia kane ka jingjop sha ki policy kiba da buh thong, ka jingdon ia ki nongialam kiba kut jingmut ha Jylla bad ha ka Sorkar Pdeng. “Ka jingkiew shaphrang ka wan bad ka lynti treikam, ka policy bad ki sienjam ba ngi shim. Ngi dei ban phohsniew ia kaba heh bad buh ia ka thong ban bteng ia kane ka jingkiew irat” ong u Conrad.

U Ambassaor ka Germany sha India Philipp Friedrich Johannes Ackermann ula kren halor ka jingthrang jong ki kompani na German ban wan sha India khamtam ha ka thain Shatei Lam Mihngi.

“Mynta u snem, 59% na ki 2000 tylli ki kompani na Germany ki don ia ka jingthmu ban kynshew kam thymmai ha India” ula ong.

Une u Ambassaor ula ithuh ia ka kam rep khlem dawai (organic farming), jingpynmih jingbam, ka kam jngohkai kaba neh shirta, ka skill development ba ki dei ki kam kiba biang eh ia ki nongkynshew kam na Germany ha Meghalaya.