Shillong, Jymmang 09 : U Chairman ka Meghalaya Industries Development Corporation (MIDC) James PK Sangma hynne ka sngi Ba-ar, ula ong ba un sa khot ia baroh ki karkhana ha Meghalaya ban thaw ia ka Joint Consultative Industries Forum (JICF) hapoh ka Jylla ban nang kyrshan ia ka jingpyrshang jong ka Sorkar Jylla ha kaban pynkhlain ia ki kam ba iadei bad ka kam karkhana hapoh ka Jylla.
U James ula ong ba ka JICF kan iarap ban ithuh ia ki kam ba hap pynleit jingmut bad kiba hap buh hakhmat na ka bynta ka jingkyntiew ia ka ioh ka kot bad ki kam karkhana da kaba pyniadonbynta lang ia baroh ki kynhun, nalor ban leh eiei halor ki kam ki ban iarap ia ka Meghalaya ba kan kynjoh sha ka thong ban lah kyntiew ia ka ioh ka kot.
“Ha ka jingialang jong nga ba dang shen bad ki kynhun ki karkhana kum ka Confederation of Indian Industries (CII) bad ka Federation of Indian Chamber of Commerce and Industries (FICCI) ha New Delhi, ngi la iakren ia ka lad ban kyntiew ia ka kam seng karkhana hapoh Meghalaya bad kumno ba kan iarap ha kaban pynurlong ia ka thong ban pynlong ia ka Meghalaya ka Jylla ba kot T. 10 billion ha ka ioh ka kot hapoh u 2028” ong u James.
“Kum ka sienjam ba nyngkong, ka long kaba kongsan ba ngin don shuwa ia ka forum jong baroh ki karkhana bad ka Sorkar khnang ba ngin lah ithuh ia ka lynti iaid nangne shakhmat da ka jingiatreilang. Ha ka jingiaid lynti jong ngi ban kyntiew ia ka ioh ka kot ka Jylla, baroh ngi donkam ban iadonlang ha kajuh ka nongrim bad kane ka dien ka sienjam sha kane ka bynta” ula bynrap.
U James ula ban jur b aka forum kan shim ia ka bynta kaba khraw bha ha kaban wanrah ia ka jingsengkam bad jingkynshew kam sha ka Jylla, ka ban iarap kyntiew ia ka Gross State Domestic Product (GSDP) nalor kan nang pynbun ia ki lad ki lynti ban kyntiew ia ka kam khaii bad ka iohkam iohjam.
Ha ka 4 tarik u Jymmang, u James ula thoh sha u Myntri Rangbah ka Jylla Conrad K Sangma halor kane ka kam, bad kyrpad ia u ba un khlieh ia ka Forum bad ka MIDC kum ka nodal agency.
Pule lang ia kane: Kem ki BSF ia 3 ngut ki Jawan ba siat iap ia u Bah Roning
