Shillong, Jylliew 20: U Myntri barim ka Sorkar bad nongialam ka BJP Bah AL Hek u la dawa naka Sorkar Pdeng ban ai ia ka jingithuh hapoh ka riti synshar jong ka ri India iaka ktien Khasi bad Garo da kaba pynrung ia ki ha ka Eighth Schedule, hadien ba ka sorkar Meghalaya ka la pynmih dang shen ia ka ain rew (ordinance) halor ka kyrdan ktien sorkar.
U Bah Hek u la ong ba ka Jylla ka la dep ban shim ia ka sienjam ba donkam bad kaba kongsan bad ka jingpynleit jingmut mynta ka phai sha nongbah New Delhi.
“Ka jingpynrung ia ka ktien Khasi bad Garo: Dang shen ngi la iohi ba ka sorkar MDA-II ka la dep mynjur ia ka ordinance kaba la mynjur da u Lat ka Jylla. Ngi la leh ia kane ha ki por ba la dep ruh lyngba ka Ordinance” ong u Bah Hek.
U Bah Hek ula kdew ba watla baroh ar tylli ki ktien ki treikam kum ki Associate Official Languages jong ka Jylla hynrei ka jingithuh ka dang dei tang hapoh ka Jylla Meghalaya.
“Mynshuwa ruh bad mynta ruh ha ka jylla Meghalaya, ka Khasi bad ka Garo ki dei ki Associate Official Languages. Mynta ruh ka dei tang lyngba ka Ordinance” u la bynrap.
U nongialam ka BJP u la ong ba ka Party kan pynbor ia ka Sorkar Pdeng ban pyndep ia kane ka kam. “Mynta kaba kongsan hangne ka long ba ngi hap ban kyrpad bad dawa ïa ka Sorkar India ban pynrung ïa ka ktien Khasi bad Garo ha ka Khyrnit kaba phra jong ka riti synshar ka ri India ban ïoh iaka jingithuh ba pura” ula ong.
Haba kylli shaphang ka bynta jong ka BJP, u Bah Hek u la ong ba ka jingdon nongmihkhmat jong ka Party ha ka Sorkar MDA ka ai ia ka lynti ba beit beit ban tynruh ia kane ka jingdawa.
“Ka BJP ka don 2 ngut ki MLA, ha kaba uwei u dei u Myntri Sorkar bad ngi buddien ia kane ban pynthikna ba ka Sorkar India kan ithuh ia ka ktien Khasi bad Garo da kaba pynrung ha ka Khyrnit kaba phra jong ka riti synshar ka ri India” ula ong.
 halor ka kyrdan ktien sorkar.){kind=link}