Shillong, Iaiong 10 : Ki Khlieh Nongsynshar na kylleng ka ri-lum Jaintia, kynthup ki Daloi bad Sirdar, kila kyntu ban nang ai bor shuh shuh ia ki ba kin lah ban iada ia ka mei mariang bad ban pynneh ia ka synshar khadar kat kum ka riti ka dustur.
Kane ka jingkyntu kala mih ha ka seminar halor ka Daloiship and Environmental Conservation, bala pynlong da ka Leiden University ha ryngkat ka jingiatreilang bad ka Jaintia Hills Autonomous District Council (JHADC), Earthtree Enviro Ltd bad ka Thomas Jone Synod College.
Ka seminar ka thmu ban ngan jylliew ha ka jingsngewthuh halor ka kam Daloi bad ka bynta jong ki ban pyni lynti ha ka jingpynneh pynsah ia ka mariang.
Ka seminar ka ai ia ka rynsan ban pyni ba kumno ki Daloi ki lah ban noh synniang ha kaban pynwandur ia ka mariang na ka bynta ka lawei jong ka ri-lum Jaintia haba pynkhlain ia ka rukom tynrai ban sumar sukher ia ka khyndew ka shyiap.
Haba ai jingkren kum u kongsan, u Executive Member ka JHADC ba khmih ia ka Forest Bah Hambertus Nongtdu ula pynpaw ia ka jinglong kongsan jong ka Jaiñtia Hills Autonomous District (Establishment of Elaka and Village and Election, Appointment, Powers, Functions and Jurisdiction of Daloi, Sirdar and Waheh Chnong) Act, 2015, kaba pynkubpr ia ki Elaka bad Dorbar Shnong.
“U Chief Executive Member ula pynbna ia ka jingthmu ban pynkylla ia ka Act, bad ngi kyrmen ba kane ka seminar kan ai iaki jingai jingmut kiba kordor na ka bynta kane ka jingpynkylla” ong u bah Nongtdu.
Ka Anna Notsu, Research Scholar na ka Leiden University, kala pynpaw ia ka jingkyrmen ba kane ka jingiakren kan lam sha ka jingpynwandur ia ka policy document ka ban sa aiti sha ka JHADC.
Kane ka seminar kala sakhi ai ka jingwan iashimbynta haduh 14 ngut ki Daloi na ki 18 ngut, baroh arngut ki Sirdar bad ki samla pule bad nonghikai na ki College bapher bapher.
