Shillong, Naiwieng 26 : Ka Myntri Sorkar bad Nongaiktien ka Sorkar MDA Kong Ampareen Lyngdoh ha ka sngi Ba-ar, kala ban jur ia ka jingdonkam ba ka Sorkar Pdeng ka dei ban iasyllok ia ka Sorkar Jylla halor ki kam ba iadei bad ka jingthung ia u Vice Chancellor ka North Eastern Hill University (NEHU).
Haba iakren bad ki nongthoh khubor, ka Kong Ampareen kala ong “Ka long kaba sngewsih…lehse ka dei kaba kongsan ia ka Sorkar Pdeng ban pynlong beit ia ka jingiasyllok bad ka Sorkar Jylla haba iadei bad ki kam thungkam thungkam khamtam ia u VC. Namar lada phi iasyllok bad shim ia ki jingai jingmut na ka Sorkar Jylla, phi lah ban iaid lait na kum kine ki kynrum kynram ba mynta bad phi lah ban wanrah ia ka jinglonng jingman kaba biang eh ia ka pule ka puthi hapoh ka skulbah”.
Ka Myntri kala pynpaw ruh ia ka jingkyrmen ba ka Committee ki arngut ki dkhot bala thung da ka Ministry of Education kan ai ia ka jingai jingmut kaba khlain ha kaban leh eiei halor ki jingsngewkhia bad ki ishu bala pynsngew da ki samla pule.
“Nga thikna ba ki samla pule kila shu iai shah ia ka jingbym biang la slem bha bad nga thikna ba ki samla pule kila shah khynniat sha kane ka jinglong jingman namar jong ka jingiai shah bala bun taiew, bnai bad snem lehse” kala ong.
“Nga kyntu ia baroh ki kynhun ba don bynta khamtam ka kynhun kaba la wan ryngkat ka bor na ka Ministry ba kin leit phai bad ban ai ia ka raiba khatduh bad ka jingdonkam ban kynthup ia ka Jylla ha ki kam ban jied ia u VC khnang ban pynthikna la u kyrtong ba shah jied, ki dei kiba biang ne em ban wan sha ka jaka kum ka Jylla Meghalaya, kaba iapher na kiwei pat ki Jylla” ong ka Myntri.
Kala bynrap “Ka long kaba kongsan ia ka Sorkar India ban shim ia kane ka khubor ba ki paidbah jong ka Jylla Meghalaya ki dei kiba pher ha kiba bun rukan, khamtam ki samla pule”.
Haba kylli, ka Myntri kala pynpaw ba kan bha eh shibun lada ailad ia ki trai shnong khamtam kito kiba la biang ka kyrdan ba kin shimti ia ka shuki ban lah shakri khambha ia ki paidbah ka Jylla.
Ka Myntri kala pynpaw “Nga kyrmen ba ka Sorkar Pdeng kan lah pynbeit noh ia kane ka kam. Nga kmen palat ba u Myntri Rangbah ka jylla, u Myntri ka Tnad Pule Puthi kila shimkhia ia kane ka kam bad kila pynbor ia ka Sorkar India ban leh eiei ha kaban pynbeit noh kham kloi ia kane ka kam khnang ba ka jingtreikam ha kane ka skul bah kan long kaba iaid beit iaid ryntih.
