Shillong, Jymmang 20 : Ka Sorkar Jylla kala pynkhamti ha ka Tnad Urban Affairs ia ka kam ban wad ia ki lad ki lynti ki ban pynthikna ba ki District Council constituency ba hap hapoh ki jaka sor, kin ioh ban pyntreikam ia ka Tied bad Untied Grant jong ka 15th Finance Commission.
Ka Sorkar kala shim ia kane ka rai ha ka jingialang kaba la lum da u Symbud Myntri Rangbah bakhmih ia ka Tnad District Council Affairs (DCA) Bah Prestone Tynsong bad ki Autonomous District Council (ADC)-ka KHADC, JHADC bad GHADC , hynne ka sngi Ba-ar ha Secretariat.
Haba kren sha ki nongthoh khubor, u Bah Prestone ula ong ba ia kane ka rai la shim hadien ka jingud jingnam jong ki ADC ba ki constituency ba hap hapoh ki jaka sor, kila mad jingeh ban pyntreikam ia ki grant jong ka Finance Commission.
“Ngi la rai ban pynkhamti ha ka Tnad Urban Affairs ia ka kam ba kan wad ia ki lad ki lynti ban leh eiei ha kaban pynthikna ba ki MDC constituency ba don ha ki jaka sor ka Jylla kin ioh ban pyntrei ia ka Tied bad United Grant bala ai da ka 15th Finance Commission” ula pyntip haba bynrap “Nga la dep bthah ia u Commissioner & Secretary ka Tnad DCA ba un iakren ia ki lai ADC bad nga thikna ba ngin sa lah ban pyntreikam ia kane ka skhim wat ha ki jaka sor nangne shakhmat”.
Haba kylli, u Bah Prestone ula ong “Ngi khlem pat ia buh por hynrei nga la ong ha ki ba kin leh ia ka kam kham kloi kat kaba lah khnang ba kin ioh ban pyntreikam naba phi tip bha ba ka 15th Finance Commission kan sa kut noh ha u Lber 2026. Ngi don satang katto katne bnai mynta. Ngi la de pong ia ki ba kin leh wut wut ia ka kam khnang ba ki MDC jong ki jaka sor ruh kin ioh lang ia kane ka skhim, kaba la phah da ka 15th Finance Commission”.
U Symbud Myntri Rangbah ula ong ba ka jingeh kala mih hadien ka jingpynmih la ka jong ka portal ban pyntreikam ia kane ka skhim.
“Mynshuwa namar ka jingbym don ka portal, ki don ki skhim bala mang ia ki ADC bad kila iasam ia kine ki skhim sha baroh 29 ngut ki MDC khlem da buh jingkylli ia ki jaka sor ne jaka nongkyndong. Hynrei hadien ba pynmih ia ka portal, ka portal kam shymla pdiang satia ia ki jaka kibym hap ha ka thup ki jaka nongkyndong. Kumta, ngi la iakren ia kane ka mat hynne ka sngi” ula ong.
Kat kum ka jingong jong u, ki don 5-6 tylli ki constituency ha kine ki lai tylli ki ADC, kiba hap hapoh ki jaka sor.
