Shillong, Naiwieng 17 : Ka Regional Committee ka West Khasi Hills kan sa ai jingmut ia ka Sorkar Jylla halor ka jingdonkam ban pynkohnguh ia ka Sorkar Assam ba kan mynjur lang ba ki shnong ba shongshnong bun eh da ki bym dei ki Khasi ne Garo ha Langpih, ba kin long noh shibynta jong ka Meghalaya.
Haba pyntip ia kane hynne ka sngi palei, u Myntri Sorkar bad Chairman ka Committee Bah Renikton Lyngdoh Tongkhar ula pyntip ba un sa pynbeit ia ka tarik ban leit jurip ia ki jaka ha Langpih Sector ha ka taiew ban wan.
“Hadien ka jingjurip, ngin sa shong sa kawei ka jingialang bad baroh ki kynhun bad ngin sa phah ia ki jingai jingmut sha ka Sorkar Jylla ba iadei bad ki shnong kiba hap hapoh ka Langpih Sector” ula ong.
Haba kylli, u Bah Renikton ula ong ba la pyntip sha u ba ka Langpih Sector kan dei kaba jyrwit jyrwat bha namar ka jingia khleh jaidbynriew khamtam ba ki Nepali ki dei kiba shong ha ki shnong bala ker sawdong da ki shnong Khasi bad Garo.
“Ta ka daw ngin sa leit jurip ban sngewthuh bad ngin sa pyrshang ban iakren bad ka Assam lada ka mynjur ba baroh ki shnong Nepali ba shah ker sawdong ha ki Shnong Khasi bad Garo kin hap noh sha u pud u sam ka Jylla Meghalaya. Ngin pyrshang ban leh ia kane” ula ong.
Ha kawei ka liang, u Myntri ula ong ba ka jingmynjur lang jong u paidbah kan dei kaba kongsan tam ha kaban lah pynbeit ia kane ka jingiakajia pud ha ka thain. Ula pynkynmaw ba ha ka jingiakren pynbeit pud ba nyngkong, ka jingdon ki jaidbynriew bad ka jingmynjur jong ki paidbah napdeng ki 5 tylli ki kyndon pynbeit pud, ki dei kiba hakhmat eh ban pynkut ia ka jingiakajia ha ki hynriew tylli ki jaka ba iakajia hapdeng ki ar Jylla.
“Namar kata, ngi khmih lynti ba ki paidbah ki dei ban iashim rai lang kum ka Shnong bad lada long kala lah kum ka thain khnang ba ngin lah ban pynkut noh ia ki jingiakajia baroh. Hynrei, lada don ka jingiapher jingmut-lada don ki kynhun kiba kwah sha Meghalaya bad don kiba kwah sha Assam, kan long kaba eh ban pynbeit ia kane ka kam” ula ong.
Kat kum ka jingong jong, ha ka jingiajurip lang ia u pud da ki Regional Committee ka Meghalaya bad Assam yn sa shim kongsan eh ia ka jingmynjur jong u paidbah .
