Dhaka, Rymphang 18 : Ka Sorkar Meghalaya kala pynpaw ia ka jingangnud ba u khla wait ka Jylla-Tirot Sing Syiem, un ioh jaka lem sa ha ka Museum jong ka Ri Bangladesh, kaba thmu ban tei ha ka byndi ba set ia une u khla wait ha Dhaka.
Kane ka sur kala mih na ka kynhun ki Myntri Sorkar bad ki Ophisar, kiba la leit ban jurip ia ka byndi ba set ia u Tirot Sing ha Dhaka hynnin ka sngi Saitjain.
“Ka Sorkar Meghalaya kan sa shimkhia ban iakren bad ka Ri Bangladesh ba kan ai jaka lem ia u Tirot Singh ha ka Museum ba kan tei ha kane ka byndi ba set ia u khla wait ka Jylla, ha Dhaka” ong u Symbud Myntri Rangbah ka Jylla Bah Sngewbhalang Dhar haba iakren bad ki nongthoh khubor ha Dhaka.
Ha kane ka jingjurip bala ialam da u Bah Sniawbhalang Dhar, la lap ba kane ka byndi kam shym la don satia ia ka bui (record) halor ka jingset ia u Tirot Sing ha kane ka byndi.
“Kumba ka long mynta, ka Ri Bangladesh kam don satia ia ka bui shaphang u Syiem Tirot, bad ha katei ka byndi kaba la set ia u ha u snem 1833 haduh 1835, haduh mynta ym shym don kano kano ka jingbuh sahnam” ula ong.
“Ka Sorkar Meghalaya kan thoh sha ka Sorkar Bangladesh ban ai jaka ban buh sahnam ia u Tirot Sing, namar kumba la iathuh da ki ophisar ba peit mynta ia katei ka byndi ba haduh mynta ki dang wad jingtip ba bniah ia ka jingdon bad ki khana ba dei ban pynsahnam” ula bynrap.
U Bah Sniawbhalang ula ong ba ka Sorkar Meghalaya kan phah ia ka bui sha ki bor ba halor ka ri Bangladesh halor ka jingim jong u Syiem Tirot Sing khnang ba kin pynneh pynsah lem ia ka nam bad kyrteng jong une u Syiem ka Jylla.
Kumjuh ruh u Myntri ka Tnad Arts & Culture Bah Paul Lyngdoh ula ong ba ka jingwan Bangladesh jong ka kynhun ki Myntri bad Ophisar ka long ban pynneh pynsah ia ka nam ka kyrteng jong u khla wait ka Ri-lum Khasi-u Tirot Sing. U iathuh ba ka Sorkar Jylla kan sa phah ia ka jingtyrwa sha ka Sorkar Bangladesh ban pynsah nam lem ia u Tirot Singh ha katei ka jaka ba u pynlut ia ki sngi ba khatduh (byndi ban pynkylla museum).
Lah ban kdew hangne, ka Sorkar Jylla ryngkat ka jingiatreilang bad ka Ministry of External Affairs (MEA) ka Ri India, ha ka 16 tarik Rymphang, kila plie paidbah ia u motdur sahnam jong u Tirot Singh ha Indira Gandhi Cultural Centre (IGCC) kaba don ha Dhaka.
