Shillong, Nailar 28 : Ka Meghalaya Teachers’ College Association (MCTA) ha ka sngi Nyngkong kala dawa ia u Vice Chancellor ka NEHU Prof Prabha Shankar Shukla ban weng noh ia ka jingpynbna (notification) ba 12 tarik Naitung, ban pynkut noh ia ka jingiapyni bor halor ka jingpyntreikam ia ka National Education Policy (NEP).
Ka MCTA kala niew ia kane ka jingpynbna bala pynmih da u Officer on Special Duty ka NEHU College Development Council Debasish Chowdhury ba 12 tarik Naitung, sha baroh ki Principal jong ki College ba iasoh bad ka NEHU ha ka ban pyntreikam ia ka NEP ka dei ka “ka jingshukor ba pyllein pyllein”.
Ka MCTA kala buh jingkylli ruh halor ka jingkynnoh rai kyrkieh ban pyntreikam ia ka NEP wat hapdeng ka jingshisha ba bun na ki College kim pat long kiba la khreh ia ka.
“Ngi dawa ia u VC ban weng noh mardor ia ka jingpynbna. Ngi la phah ia ka shithi ha ka 21 tarik Naitung bad namar b aula sngap mynthi kumta, ngi la sdang ia ka non-cooperation movement naduh ka 1 tarik Nailar” ong u Dr Airpeace W Rani, General Secretary ka MCTA haba iakren bad ki nongthoh khubor.
Kat kum ka jingong jong u, ki Nonghikai jong ki 22 tylli ki college kiba don ha ka lama jong ka MCTA kila boycott ne sangeh shim klas jong ka semester ba nyngkong hapoh ka NEP bad kim nym leh ruh ia kano kano ka kam kum ka jingset jingkylli ialeh eksam jong ka course semester ba nyngkong hapoh ka NEP. Hynrei, kin iai bteng ban ai jinghikai ia ki samla pule ka 3rd bad 5th semester kat kum kane ka course ba mynta.
“Ka lynti ba shakhmat ban pynkut ia kane ka jingiapyni bor kat kum ka jingsngew jong ngi ka long ba u VC un weng noh ia ka jingpynbna bad ban pynsangeh shuwa ia ka NEP na ka bynta ka samoi pule ba mynta bad ban shim biang da ka course kaba rim. Ngi la iakhih la jan shibnai kumta, ngi kyrpad ia u VC ban weng noh ia ka jingpynbna bad pynkut ia kane ka jingia pynibor” ong u Dr.Rani.
Haba kylli ia ka sienjam ban sa shim da ka MCTA lada u VC um pynsngap ia kane ka jingdawa, ka President ka MCTA Dr BH Buam kala ong “Ia kane ka jingkylli, ngin hap ban iakynduh shuwa kum ka synjuk bad ngin ym lah ban iathuh ia kata. Ngin hap ban iashim rai lang hadien ka jingiasyllok kaba sani bha”.
Haba kylli la kin leit iakren bad u Visitor ka University, ka Dr Buam kala ong “ Ngim ym lah ban iathuh lypa ia kane hynrei ki don ki jingthmu”.
Haba pynpaw ba ka Iingkashari kan dei ka lynti ba khatduh ha ka jingiakhun pyrshah ia kane ka rai ba kyrkieh ban pyntreikam ia ka NEP, ka President kala ong “…ka don ka lad, ka jingkhang ka don hynrei ngi hap ban sngewthuh ba lada ngi leit sha Iingkashar, ki kam ain kin shimpor da ki snem bad shano kin poi kine ki samla pule ba mynta”.
U Dkhot ka MCTA Shiv Pradhan u iathuh ba ka jingpynbna ba 12 tarik Naitung kala kam ba ka rai ban pyntreikam ia ka NEP ka dei kaba la shim kat kum ka rai jong ka Academic Council ba 110 jong ka NEHU bad ia kane la ai jingmynjur ruh da ka Executive Council.
