Shillong, Lber 27 : Ka Liang Pyrshah ha Khasi Hills Autonomous District Council (KHADC) kala kyntu ia ka Executive Committee ba ialam da ka VPP ba kan pynlong iaka jingiasyllok bad baroh ki MDC hashuwa ban khot iaka Dorbar Kyrpang ban pynkylla ia ka Rule 128 jong ka Assam District Rules, bad ban pynshai ia kaei kaba long ia ka Bill 2018 kaba kwah ban bishar bniah ia ka.
Haba kren sha ki nongthoh khubor ha ka sngi Thohdieng, u Nongialam ka Liang Pyrshah Bah Titosstarwell Chyne ula ong ba ka jingkulmar ha ri-lum Garo bad ka jingpynkylla ka GHADC ia ka Rule ba khang ia ki bar jylla ban iashimbynta ha ka elekshon ka Council kala pynlong kongsan ia ka KHADC ba kan leh eiei-hynrei tad hadien ka jingiasyllok lang.
“Ngim ong ba ka amendment ka dei ban long kajuh kum ka GHADC” ula ong haba bynrap “Lada phi ong Scheduled Tribe, ki don bun ki riewlum bala ithuh kum ki ST hapoh ka Order 1950. Gaba ngi ong KHADC, ka dei ban long beit thik tang ia ka Jaidbynriew Khasi”.
U Bah Titos ula iathuh ba ka amendment bill 2018, bala mynjur da u (L) Bah HS Shylla kum u CEM, kala iaid kham palat ia ka rule 128 ban pynkylla kyrteng ia ka Rules sha ka Khasi Hills Autonomous District Rules, da kaba weng noh ia ka kyntien ‘Assam” na ka ain u snem 1950.
“Ka AD Rules ka long kumjuh ia baroh lai tylli ki ADC. Ngi tyrwa ba man ki Council ki dei ban don la ki jong ki Rules” ula ong haba bynrap ba ka jingpynkylla dang shen jong ka GHADC kala dep ioh ia ka jingmynjur na u Lat ka Jylla.
U iathuh ba ia ka Bill 2018 lah dep ban phah sha ka Tnad District Council Affairs bad ka Expert Committee, kaba la buh ia 11 tylli ki jingkylli kiba ka KHADC kala dep pynshai ha katei ka por.
Namar ka Bill ka dang sahteng, ka Iingdorbar kam lah ban wanrah ia ka bill thymmai satang da ka phah pynphai shuwa ia kaba hashuwa ba kan bishar kham bha lane wanrah da ka bill kaba long da kumwei pat.
U Bah Titos ula iathuh ba ka KHADC kala dawa ia ka amendment ia ka Rule 128 hynrei ka donkam ia ka jingmynjur lang baroh.
“Kane kam dei ka jingmyntoi shimet hynrei ka jingmyntoi jong ka Council bad ka Jaidbynriew trai muluk” ula ong haba pynrem ia u CEM ka VPP namar ka jingbym treh iakynduh ia ka Liang Pyrshah wat haba lah phah ktien.
 kala kyntu ia ka Executive Committee ba ialam da ka VPP ba kan pynlong iaka jingiasyllok bad baroh ki MDC hashuwa ban khot iaka Dorbar Kyrpang ban pynkylla ia ka Rule 128 jong ka Assam District Rules, bad ban pynshai ia kaei kaba long ia ka Bill 2018 kaba kwah ban bishar bniah ia ka.){kind=link}