Phah pynshai ia u SP ka EJH ban nym ngat jingpynsajia
Shillong, Rymphang 07 : Ka Iingkashari Meghalaya High Court hynne ka sngi ba-ar, kala pynpaw ba ka long kaba donkam ban khot noh ia ka Central Armed Police Force (CAPF) ban peitngor bad pynsangeh ia ka jingtih beain bad khaii ia u dewiong hapoh ka Jylla.
Ka Iingkashari kala bthah ruh ia u Superintendent of Police ka East Khasi Hills ban ai jingpynshai balei ba um dei ban ngat ha ka jingpynshitom halor ka jinpynkhein ia ka hukum ka Iingkashari ba kynthup ka jingset ha phatok.
“Kat kum ka jinglong jingman mynta bad haba peitthuh ba ka Jylla kala iohpor jan shisnem ba kan shim ia ki sienjam bad kine ki sienjam bala shim da ka Sorkar kim shym la treikam pura, ka long kaba donkam ban khot noh ia ka CAPF ban peitngor bad khang ia ki kam beain ba iadei bad ka jingtih dewiong kaba dang bteng hapoh ka Jylla” ong ka Division Bench ha ka hukum bala pynmih haba shong bishar ia ka PIL halor kane ka kam.
“U Dr Mozika, Deputy Solicitor General ka India, uba donlang hapoh ka Iingkashari, la kyrpad ba un shimkhia na ka bynta ka Sorkar Pdeng bad ban pyntip sha ka Iingkashari, haba shong bishar biang ia kane ka kam hadien shitaiew haba iadei bad ka jingwanrah ia ki pyrton la ka dei ki Cengral Industrial Security Force lane Central Reserve Police Force ban shimti ia ka jingtehlakam ia ka kam tih dewiong beain kynthup ka jingkhaii napoh ki bor ka Sorkar Jylla” kala ong.
Ka Iingkashari kala ong ba ka jingtih dewiong pathar ha Jylla ka lah ban lam sha ki jingpynjulor kaba jur bha. La paw ba u dewiong bad u mawshun u pahuh bha ha ka Jylla bad kine ki mar ki dei kiba la sh tih pathar.
Ka IIngkashari ka ong ba ka jingbym biang ka jingnang jingstad bad ka jingbym don ki lad ki lynti da kumwei pat kala pynlong ia kiba bun ha ka Jylla ban pynjot ia ki mei ramew kum ka jingpom dieng bad jingtih marpoh khyndew.
Ka ong ba ka rukom tih dewiong jong ki trai shnong hangne kaba bun hi ka dei ka jingtih thliew khnai ha kaba uwei ne arngut ki briew ki iatih ia ka thlieh tang ban ioh rung bad sa tih ia u dewiong naka ramew bad sa sei shabar.
Nalor ki jingma ba ka krem ka lah ban khyllem, kum kine ki jingtih ki pynlong thliew shapoh jong ka khyndew bad ki lah ban khyllem ha kano kano ka por lada khie u jumai.
Ka Iingkashari kala shimkhia ruh halor ki khubor ba mih ha ki kot khubor ba lai ngut ki nongtih dewiong kila iap ha kawei ka par dewiong ha Rymbai, East Jaintia Hills.
La bthah ia u Chief Secretary ka Jylla ban aiti ia ka kaiphod ban pynthikna ia kane ka khubor ba mih.
Ha kajuh ka por, ka Iingkashari kala bthah ia u Superintendent of Police ka East Jaintia Hills ban ai jingpynshai balei ba um dei ban pynsajia ba pynkhein hukum kynthup ka jinghap shong phatok, pyrshah ia u namar ka jingpynkhein pyllein pyllein ia ki hukum ka Iingkashari ban tehlakam ia ka jingtih beain ia u dewiong kaba dang iai haduh mynta ha kylleng ki jaka jongka East Jaintia Hills bad ruh ka jingkhaii tuh ia une u marpoh khyndew.
Ka Iingkashari kala buh ban bishar biang ia kane ka kam ha ka 14 tarik u Rymphang.
