Shillong, May 22: Ka Hynniewtrep Integrated Territorial Organization (HITO) hynne ka Lah Sngi u Blei kala pynpaw ia ka jingdonkam ia ka jylla ban khmih bniah biang iaka Job Reservation Policy 1972, ban pynthikna ba ki Khasi bad Jaintia kin kham ioh bun katkum ka jingbun paid kaba ki don.
Ha ka kyrwoh khubor, u President ka HITO u Donbok Dkhar ula ong, ka long kaba don iaka jingshisha bad kaba don nongrim ba ki riewlum Khasi-Jaintia kin ym sngewhun ia ka jingbhah kam.
“Ka Job Reservation Policy 1972 dei ban khmih bniah biang da ka sorkar jylla khnang ba kan pynthikna ba kan don ka jingbhah ka bym shah liang da kaba pynshong nongrim ia ka jingdon u paidbah kumba long mynta” ong u Donbok.
Ula ong, ka Meghalaya Job Reservation Policy la wanrah da ka lynti jongka Resolution ka sorkar ha ka 12 tarik u Kyllalyngkot 1972, kaba la pynmih da u Secretary (Special) jongka sorkar Meghalaya, ban iada ia ka bha ka miat jong ki jaidbynriew riewlum ha ka jylla Meghalaya.
Katkum ka Job Reservation Policy haduh mynta, la bhah 40% ia ki kam kiba lait ia ki Khasis and Jaintia bad 40% ia ki Garo bad la mang pat 5% ia kiwei pat ki riewlum kiba don ha Meghalaya.
Ula pynpaw ba ka job reservation policy katkum ka Resolution ha u Kyllalyngkot 1972 ka kdew shai ba ia ka jingbhah la pynshong nongrim da ka jingbun paid.
“Ka paw ruh ba kane kajuh ka Reservation Policy kam long kaba iahap bad ka jingbun paid hapdeng ki riewlum Khasi, Jaintia bad Garo ha ka jylla haduh kine ki sngi ba mynta, kaba long kumjuh kumba la pynshong nongrim da ki nongthaw polisi treikam kiba la shu mutdur ym da kaba peit iaki jingtip lyngba ka Census” la pynpaw u nongialam ka HITO.
Ula ong, katkum ka Census 2011, ki Khasi & Jaintia haba khein kyllum lang ki don 14,11,775 lak ngut ha ka jylla katba ki Garo ki don 8,21,026 lak ngut ha ka jylla.
“Katei ka pyni ba kiba bun paid kidei ki Khasi-Jaintia ha ka jylla hybrei kim shym la ioh pat iaka jingbhah kaba biang katkum ka reservation policy,”
Ula bynrap da kaba ong “La kdew ba ki Khasi-Jaintia kila shah pynduh ia ka hok jongki ban ioh ia ka bhah bad kumta ki Khasi bad Jaintia khamtam ki samla kila hap mad ia ki jingeh kiba khraw ha ka jylla watla kim shym la leh bakla eiei. Shuh shuh ka bha ka miat bad ka roi ka par ia kine ki jaidbynriew kala shah ktah jur namar ka jingbym ai ka jingmihkhnat ne jingbhah kaba biang ha ki kam sorkar”.
Nalor kane ka jingpyntreikam ia ka roster system khlem da kaba pynmih iaka office memorandum la leh khlem da bishar bniah bha ia ka jingbun paid bad khlem da peit iaka jingmyntoi bad jingduhnong.
