Shillong Naiwieng 12: Ka Forever Young Sports Club, hynne ka sngi Saitjaiñ kala pynlong iaka Wine Festival kaba 18 ha Pine Mount Ridge, Shillong ha kaba ki paidbah kila iatuid ban thied ia ki waiñ ki bapher bapher.
Ha kane ka tamasa die waiñ kila don 11 tylli ki dukan kiba la die ia ki waiñ bapher kiba la shna bad pynmih na kane ka jylla bad kila don ruh ki dukan kiba die ia ki doh bad ki jingbam bapher.
La pynbyrngia iaki paidbah kiba wan sha kane ka tamasa da ka kynhun tem kaba la tip kum ka Colours kiba la rwai ia ki jingrwai kiba pynsngewtynnad ia baroh.
Ka jingpynlong ia kane ka tamasa ka long ruh kum shi bynta jong ka jingshim rai ka sorkar jylla kaba la ai ka jingithuh katkum ka aiñ ia ki nongshna waiñ ka jylla kaba long ka jingjop kaba khraw ia ki nongshna waiñ kiba don haka jylla baroh kawei.
U Nongseng ka Forever Young Sports Club u Bah Michael Syiem, ula iaroh iaka sorkar kaba la ialam da u Myntri Rangbah ka jylla u Conrad K Sangma uba la pynurlong iaka jingangnud jong ki nongshna waiñ ka jylla, hynrei ula pynpaw pat iaka jingsngewsih ba ka sorkar jylla kam shim la kynthup pat iaka Wine Festival haka Tamasa Synrai ne Autumn Festival.
