Shillong Naitung 27: Ka Federation of Khasi, Jaintia and Garo Peoples (FKJGP) hynne ka sngi Palei kala ai jingmut ia ka Khasi Hills Autonomous District Council (KHADC) ba kan pynkhlain ia ki kyndon aiñ jong ki It ki Hima bad ki Dorbar Shnong ban tehlakam ia ka jingrung kyrthep ki bar Jylla sha ki shnong ki thaw ha u pud u sam ka Council.
Ki Nongialam ka FKJGP ba la lamkhmat da u President Bah Dundee C Khongsit bad General Secretary Bah Eldie Newton Lyngdoh, kila buh ia kane ka jingai jingmut hakhmat u Chief Executive Member (CEM) ka KHADC Bah Pyniaid Sing Syiem.
U President ka FKJGP u Bah Dundee Cliff Khongsit haba iakren bad ki nongthoh khubor, ula ong ba ka jingwan iakynduh ia u CEM ka KHADC, kadei hadien ba ka Council kala shim ia ka rai ban pynkhlaiñ noh ïa ki aiñ jong ki Dorbar Shnong kin lah ban tehlakam ïa ka jingwan rung khyrthep ki bar jylla ha ki shnong ki thaw ki jong ki.
“Kano kano ka jingthmu ban iada iaka ri bad ka jiadbynriew, ngi donkam ban kyrshan bad ban ai iaka jingkyrshan bad ka Federation ruh ka ai jingkyrshan ia kane ka jingthmu jong ka Council ban pyrkhing iaka jingwan rung ki bar jylla ha man la ki shnong ki thaw” ong u Bah Dundee.
Ula ong haduh mynta kam pat don ka aiñ ban tehlakam ia kiba wan nabar bad ka seng ka sngewkhia ba ki don ki katto katne ki bar jylla kiba dang shu wan ha ka shi taiew ne shi bnai ha ka jylla, hynrei kila ioh ruh kyrteng haka Electoral Roll bad kane kan buh iaka jaidbynriew ha ka jingma kaba khraw.
“Ki don 4 ne 5 tylli ki Constituency ha East Khasi Hills kiba la i ma bha namar ba la bun da kiwei pat ki jaidbynriew bad kine kila don bynta ha kaban jied ia ki nongmihkhmat ki jong ngi, kumta ngi sngewkhia bha halor kane bad nga kyrmen skhem ba lyngba ka jingshimkhia ka District Council kan lah ban iada iaka jaidbynriew” ong u Bah Dundee.
“Lada kiba nabar kila bun paid, kum ka jaidbynriew ngin sa shah rem ha kaba iadei bad ka synshar khaddar namar yn ym don shuh ia ki nongmihkhmat kiban kren na ka bynta ka bha ka miat jong ki paradoh parasnam ne na ka bynta ka jaidbynriew namar ia ki la pynjop elekshon da kiwei pat ki jaidbynriew” ula bynrap.
U Nongialam ka FKJGP ula ong, ba ka jingma ka ap ruh iaka jaidbynriew ha kaba iadei bad ka khaii pateng bad kumta ka seng kala pynsngew ha u CEM ka KHADC ba ka Council dei ban ai Trading License thymmai ia ki bar jylla lada ki trai ri trai muluk kila lah ban trei hi ia ka kam bad lada ka Council ka iai bteng ban ai Trading License thymmai kan long kumba pynrem hi dalade ia katei ka aiñ.
“Ki khynnah Khasi mynta kim khmih lynti shuh ia ki kam sorkar hynrei ki dang wad ia ki lad ki lynti ban seng ia ki kam lajong hynrei kane ka jingthmu ka jongki kala shah pynrem noh namar ka jingai laitlan jong ka KHADC ia ki Trading License sha ki bar jylla ba kin sdang ia ki kam khaii pateng bad ki samla trai ri kim lah shuh ban iakhun kylla bad kine ki bar jylla” ong u President ka FKJGP.
Ula ong ruh ba ka seng ka dap da ka jingsngewkhia halro ka jingngop ki samla ha ki jingdih kiba sniew kum u drok.
“Ngi la kyntu iaka KHADC ba kadei ban bthah ia ki Rangbah Shnong ban shna ia ki aiñ ki kanun kiba paka ban lah ban tehlakam ia ki khun samla ki jong ngi” ong u Bah Dundee.
 hynne ka sngi Palei kala ai jingmut ia ka Khasi Hills Autonomous District Council (KHADC) ba kan pynkhlain ia ki kyndon aiñ jong ki It ki Hima bad ki Dorbar Shnong ban tehlakam ia ka jingrung kyrthep ki bar Jylla sha ki shnong ki thaw ha u pud u sam ka Council.){kind=link}