Shillong, Iaiong 10: Ka seng Federation of Khasi Jaintia & Garo People (FKJGP) hynne ka sngi kala pyntip ba haka 17 tarik mynta u bnai kin sa leit ban kynduh iaka sorkar jylla ban ai jingmut kumno ban kyntiew iaka kam jngohkai pyrthei hapoh ka Meghalaya naka bynta ban kyntiew ruh iaka ioh kam ioh jam ki samla ka jylla.
Haba kren sha ki lad pathai khubor u president ka FKJGP u bah Dundee Khongsit ula ong ba naka liang ka seng kala dep ban lum ka jingialang bad ki nongkitkam jong ki kynhun pyniaid kali kit iaki nongwan shadkai suwari, ki trai jong ki Home Stay bad ki Tour Operators ban iathir kumno ban leh naka bynta ban kyntiew iaka kam jngohkai pyrthei ha baroh kawei ka jylla.
U bah Dundee ula iathuh ruh ba dang shen ka kynhun jong ka seng FKJGP kila leit shapoh ka jylla Sikkim bad kila iaphylliew jingmut bad ki Tour Operators, ka Travel Agents Association of Sikkim (TAAS) bad ki ophisar ka tnat kam jngohkai pyrthei jong ka Sikkim haba iadei bad ki sienjam ba kane ka jylla ka shim ban kyntiew iaka kam jngohkai pyrthei.
Ula iathuh ba haka jingiakynduh bad ki riewshemphang ka jylla Sikkim, ka seng kala ioh jingtip kumno ban leh naka bynta ban kyntiew iaka kam jngohkai pyrthei bad dei namar kane ka Sikkim kadei ka jylla kaba kiew bha haka jinglah ban khring iaki nongwan shangkai suwari ym tang napoh ka thain shathei lammihngi hynrei na baroh kawei ka ri India.
“Haka jingleit jurip iaka jylla Sikkim, ka FKJGP kala iakren ruh haba iadei bad ka jingpyntreikam iaka Inner Line Permit (ILP) bad ki riewshemphang ka Sikkim kila pyntip ba ka ILP kam don jingktah iaka jingwan rung ki nongwan shangkai pyrthei hapoh kane ka jylla” la ong u bah Dundee.
U bah Dundee ula ong ba lada ka sorkar jylla ka kwah ban kyntiew iaka kam jngohkai pyrthei, kadei shwa ban thaw iaki Policy, kumno ban ithuh iaki ba wan shangkai suwari bad kumno ban ithuh ia kito kiba shu wan ban trei bylla hapoh ka jylla.
Ula ong ba ka jingwan rung ki briew hapoh ka Meghalaya kadei hi lyngba ka jingwan shangkai suwari bad ka jingwan bylla ne wan trei bad dei namar kane donkam ban don daka Policy ban ithuh hapdeng kino kiba wan shangkai suwari bad kino kiba shu wan rung tang ban bylla ne wan trei.
Nalor kane u president ka FKJGP ula ong ba ka sorkar jylla kadei ban pynjur iaka rukom pynbor iaka sorkar pdeng ban pyntreikam noh iakia ILP bad kadei ruh ban pynsngewthuh shaka sorkar pdeng ba ka ILP kam don jingktah iaka kam jngohkai pyrthei bad kam don jingktah iaka leit ka wan ki briew khamtam kito kiba hap iaid na Meghalaya ban leit sha kiwei pat ki jylla.
