Shillong, Rymphang 05: Ka Viksit Bharat Ambassadors Meet kaba la long ar sngi, kala kut noh hynne ka sngi Nyngkong ha Pinewood Hotel, ha nongbah Shillong.
Ha kane ka Regional Workshop la wan ban iashimbynta na ka jylla Assam, Manipur, Sikkim, Tripura, Nagaland, Arunachal Pradesh bad kiba na ka jylla Meghalaya.
La plie ia kane ka jingialang da President ka BJP Mehghalaya u Rikman G Momin, kum u Convenor bad u Vice President Gagan Jain kum u Co-convenor, ha ryngkat bad kiwei kiwei ki nongialam kiba pawkhmat jong ka seng.
Ki nongiashimbynta kila ia sam ia ki jingtip bad ki jingai jingmut kumno ban iohnong bha lyngba ka jingpyndonkam ia ka NAMO App bad la thaw ruh ia ki lad ki lynti ban pynthikna ba ki paidbah na kylleng ki bynta kin download ia ka App ban ioh ban pyniasoh ialade bad u Myntri Rangbahduh ka Ri, kaba long ka lynti kaba biang tam ban ioh kheit ia u soh ka juk kaba mynta bad ka jingai jingshakr iba bha jong ka sorkar.
Ha katei ka jingialang, ki nongiashimbynta kila iaroh iaka NAMO App bad kila iengskhem ha ka jingmut ban pyndep ia ka jingiakob ha ka 100 sngi, ka jingiakob kaba iwei pa iwei i nongrah tiensyiem in ktah iaka jingim jong ki briew da ka lynti kaba ai mynsiem, ka jingai ia ki jingmut bad kumta ter ter.
Kawei naki nongrah tiensyeim kala pynpaw da kaba ong,”Nga sngewsarong ban long ka Viksit Bharat Ambassador na Meghalaya bad ka jingiohi jngai jong u Myntri Rangbahduh ka ri kala ai pynshlur ia nga ban iashimbynta ha kane ka jingiakhun. Ia nga, ban noh synniang naka bynta ban kyntiew iaka ri ka long ka burom kaba khraw bad nga ngeit skhem ba kan mih kaei kaei kaba bha na kane ka sienjam bad kan pynkylla ia ki paidbah, ka imlang sahlang bad iaka ri baroh kawei”.
Ka jingthmu jong iwei pa iwei i Viksit Bharat Ambassador ka long ban kyntiew ia kakolshor jong ka roi ka par, ka jingneh skhem bad ka jingiatylli, ka jingbat kularda baroh lang ban thaw iaka ri kaba kiew ha ka roi ka par bad kaba khlain.
