Nongpoh, Naiwieng 09 : Ka tamasa Amur Falcon-2024 kaba la pynlong ha Umroi Madan, kala poi noh sha kaba kut hynne ka sngi Saitjain hapdeng ka jingiphuh iphieng bad pynsahnahnam da ka jingpynkup painsngait ia ka Miss bad Mr Amur Falcon 2024.
Kane ka tamasa ka dei kaba la pynlong da ka Eastern Ri-Bhoi Tourism and Environment Development (ERTED) ha ka jingïatreilang bad ka Tyrso Valley Wildlife Protection Society.
Ia kane ka tamasa la pynlong naduh ka 7 tarik Naiwieng.
Ka jingthmu ba hakhmat eh haba pynlong ia kane ka tamasa ka long ban pynsngewthuh ia ki paidbah ba kin ym pyniap ne buh jingma ia ki sim Kbeit kiba la tip kum ki Amur Falcon, kiba ju wan man u snem ha u bnai Risaw sha ka thain Tyrso bad Umru, Ri-Bhoi District.
Ia kane ka tamasa la pynshongshit da ki jingiakop bapher bapher nalor ki jingrwai bad ka jingiakop Miss bad Mr Amur Falcon, 2024, kaba la iashimbynta da ki samla na ka thain Eastern Ri-Bhoi.
Ka samla Deiphibanri Mynsong kala ioh ban rah ia ka nam kum ka Miss Amur Falcon 2024 katba u samla Pynthymmai Sylliang ula ioh rah ia ka nam kum u Mr-Amur Falcon 2024.
U Bah Alos Nongpoh, General Secretary ka TVWPS, u la ong ba kane ka tamasa ka long ruh kum ka lynti ban pynphriang ïa ka khubor halor ka jingdon ki jait sim Amur Falcon kiba wan buhai shnong shisien shisnem, ban don ka jingkitkhlieh ban ïada ïa kitei ki sim na ka jingpyniap pathar bad ban kyntiew ruh ïa ka ioh ka kot jong ki paidbah lyngba ka kam jngohkai pyrthei, kaba lah ban ïarap ïa ka thaiñ ba kan nang roi shakhmat.
