Shillong Naiwieng 07: Ka Shad Nongkrem kaba ju pynlong man la u snem da ka Hima Khyrim ha ïingsad, Smit, kala kut noh hynne ka sngi nyngkong ha ka jingiphuh iphieng da ka jingia shimbynta shitrhem da ki rang kynsai bad ki thei samla bad la pynkut pat ia kane ka shad da ka jingleh niam leh rukom.
Haba kren haka jingialang, u Myntri Rangbah ka jylla u Conrad K Sangma ula pynpaw iaka jing donkam ban pynneh pynsah ban iada bad ban kyntiew iaka Shad Nongkrem bad kiwei kiwei jinglehkmen tynrai (Festival) jong ki paidbah ka jylla.
“Ki Festival bad ki kolshor kidei kiba pynithuh iaka jinglong tynrai ka jong ngi, kumta ngi dei ban pynthikna ba dei ban pynneh pynsah bad ban iada bad kyntiew iaki” ong u Conrad haba bynrap, “Nga dap da ka jingmen ban iohi ba ngim shym la pynduh pyndam iaki kolshor ki jong ngi bad nga ai mynsiem ba ngim dei ban pynneh pynsah bad ban kyntiew ym tang iaka Shad Nongkrem hynrei ia baroh ki Festival jong ki jaidbynriew kiba don hapoh ka jylla bad ngi dei ban trei shitom ban pynneh pynsah iaka jinglong tynrai ka jong ngi”.
U Myntri Rangbah ula pynbna ruh ba ka sorkar kala rai ban mang T.2 Klur haka wat kaba nyngkong ban pynbha bad kyntiew iaki jaka kiba pyndonkam ha kaban pynlong iaka Shad Nongkrem.
Today we handed over the sanction order to the Syiem of Hima Khyrim Paiem Balajied Sing Syiem of ₹1 Crore out of the total ₹2 Crore sanctioned to the Dorbar Hima Khyrim for the Nongkrem Dance & for the upgradation of the infrastructure in the vicinity of the Iing Sad pic.twitter.com/8Ful0nRHv7
— Conrad Sangma (@SangmaConrad) November 7, 2022
“Ngan pynthikna ba ka sorkar kan ai jingiarap da ka pisa ha man ba pynlong iaka Shad Nongkrem ha ki snem ban wan ban pynthikna ba kane ka shad tynrai kan iai long kaba heh bad ban pynthikna ba kane ka jingrakhe kan long kaba shongkun ym tang naka bynta ki paidbah ki jong ngi hynrei wat na ka bynta ki briew bad ki nongwankai sngewbha khnang ba kin iohi bad kin kmen bad ba kin ioh ban don bynta lang ha katei ka jingrakhe” ong u Myntri Rangbah ka jylla.
U Syiem ka Hima Khyrim u Paiem Balajied Sing Syiem, ula ong ba kane ka Shad mynta ka kynti ka long kaba heh bha namar ba ha kine ki 2 snem kiba la dep, ym shim la lah ban pynlong ia kane ka Shad kaba heh namar ka jingwan saphriang ka Khlam COVID-19.
U la ong, ba mynta ka kynti ki don palat 300 ngut ki nongshad kiba lawan iashimbynta kiba kynthup ia ki kynthei bad ki shynrang na kylleng ki jaka kiba hap hapoh u pud u sam jong ka Hima Khyrim bad kumjuh ruh na kiwei pat ki jaka.
U Paiem ula pynpaw ruh iaka jingsngewnguh ia u Myntri Rangbah ka jylla halor ka jingai jingiarap iaka Hima bad ula ong ba kan long ka jingmyntoi shibun na ka bynta ban bteng ban pynlong ia katei ka Shad kaba heh bad kaba shongkun.
Ula ong, ha ka jingleh ia ka niam ka rukom la shem ruh ba ki dak ki shin ki long kiba bha.
Ha kane ka sngi la wan ban sakhi ia kane ka Shad Tynrai u Khasi da u Lamphang ka iingdorbar Thawaiñ ka jylla u Bah Metbah Lyngdoh, ki Myntri ka Sorkar Jylla kiba kynthup ia u Bah Sanbor Shullai, Bah Renikton Lyngdoh Tongkhar, Bah Banteidor Lyngdoh bad u Bah Dasakhiat Lamare, u Chief Executive Member (CEM) ka KHADC u Bah TW Chyne, ki MLA, MDC bad kiwei kiwei.
Ha kane ka Shad ki paidbah kila ioh ban sakhi ba ki Khun Syiem kila iashimbynta ha ka shad ha kaba la synran ia ki da ki thei sotti nylla bad ki rang kynsai na kylleng ki shnong ki thaw kiba hap hapoh ka Hima Khyrim.
Ka shad Nongkrem bad ka Pom Blang kadei shi bynta na ka jingleh niam ki khun ki hajar jong ka Hima Khyrim ban ainguh ia ka Lei Synshar na ka bynta ka bha ka miat jong u khun u hajar ha baroh ki liang haka jingim jongki ba man la ka sngi, la ka long haka rep ka riang, ka ioh ka kot, ka shongsuk shongsain, ka pule puthi bad kiwei kiwei.
